Юмаф цёра

Эрясть-ащесть атят-бабат кафонест. Синь ашель шачисна, ашель касысна. И вов фкя кизоня атять авац пяшкодсь. Авась кучезе сонь базару. Атясь рамась, мезе эряви, рамась калнят, ярх-цась калняда кшиня мархта и тусь куду. Мольсь, мольсь, сась симомац, ваны: кить крайса эши-ня, сон комась и кар-мась симома. Вдруг сонь кати-кие фатязе сакалда. Атясь нотфнесь, нот-фнесь, аф нолдасы.

— Нолдамак, — корхтай.

— Аф нолдатя, атя. Надияфтт, мезе аф содат кудсот, нолдате.

Атясь думандась, думандась, мезе аф содай кудсонза, вроде, сембонь содасыне.

— Сявк, мезе аф содан кудстон.

Колдунць нолдазе атять, и сон тусь куду. Молемста сонць думандай: «мезе шта аф содан куд-сон?» Аньцек пачкодсь атясь веле пети, тейнза ни азондыхть: «Бабаце цёраня шачфтсь». Атясь куду молемс авардсь, кудонц ваксса нардазень сельмоведензон и сувась куду.

Эряйхть киза, эряйхть кафта, эрясть комозь киза и рьвяяфтозь цёраснон. Сявсть рьвяня, пяк ни бойкай. Цёрась эрясь аф ламос аванц мархта и юмась. Вешендсть, вешендсть эсонза, косто-вок изь мув.

Весть атясь тусь вири пенгас, вешендсь, вешендсь коське пенгат, ашезь шарьхкоде, кода сувась ичкози. Ваны: тяса яння. Сон тусь ся яннява. Мольсь, мольсь атясь и повсь кудняс, сувась ся кудняти, а тоса ащи цёрась.

— Ётак, аде, аляй, — корхтай.

Ётась атясь, озась, кармасть корхтама.

— А тяни, — корхтай цёрась, — кяшть аксялу.

Атясь кяшсь аксялу и учи. Аф ламос ащемда меле кармасть кудняв сувсема шяйтаттне. Су-вайхть и сувайхть. Сувасть, кштисть-морасть, и тусть. Атясь лиссь аксялда и корхтай:

— Аде, цёрай, куду!

Цёрась согласиндась. Тусть кафонест куду. А кить лангса ульсь эрьхке. Цёрась валом-валом кармась шаштома эрьхкти. Аньцек пачкодсть малазонза, цёрась жольнефтсь ведти и юмась. Атясь аварькшнесь, аварькшнесь и тусь куду. Кудса ши сон аварди, кафта аварди. Бабац приме-тазе и кизефнесы:

— Мезень, атя, горяце? А тейне аф азондсак!

Атясь азондозе бабати сембонь, кода ульсь. Бабась и корхтай:

— Молякан, мон, атя, варчса, может, монь мархтон сай.

Бабась тусь, но сась сонга авардезь. Соньге васькафтозе цёрась. Атят — бабат ши авардихть, кафта авардихть. Рьвянясь приметазе тянь и кизефнесыне:

— Мее тинь тяфта пичеттяда? Мезень горянтте?

Бабати аш месть тиемс, азондозь.

— Ах, акаяннайсь, мон тонафтса, кода атят-ават васькафнемс!

И тусь рьвянясна мирденц инкса. Мольсь, мольсь, музе ся куднять, сувась, виде, потмо-сонза мирдец.

— Ах, вона коза шотцень кяшендьсак, — ушедсь шумнама эсонза.

— Тят шумна эсон, сейчас пидян мезе-мезе, и минь ярхцатама.

— Ся кода стане, тон пидят? Коса няентьфоль, штоба алясь авати пидель.

Музень рьвянясь цёрать запасонзон и кармась пидема. Пидесь-тись, андозе мирденц, а мирдец корхтай:

— Тяни кяшть аксялу, сюруфне — пулуфне сайхть.

— Мле, мезе, — корхтай, — кяшан! Кда эряви тейть кяшемс, тон и кяшть!

А ся пингть кармасть сувсема кудняв шяйтаттне. Сембе сувсесть и ваныхть: мес тя авась тяса. Синь ашесть кшти, ашесть мора. Тусть-тисть шяйтатане, рьвянясь корхтай:

— Тяни, аде куду. Саты шотцень кяшендить!

Цёрась согласиндась, тага кармась пачкотькшнема кить трваса эрьхкти. Цёрась уски эрьхкть шири, стирсь уски кудть шири, но цёрась сембе сяка комотсь эрьхкти, а стирсь — мельганза. Топадсть синь фкя куд пряс. Сувась цёрась ся кудняти, стирсь кядезонза кундаф, аф иляткшни, сонга сувась цёрать мельге. Сувасть, а тоса пяшксе шяйтанда, сембе ваныхть лангозост, теть-козь сельмоснон. Оцюнясна ванць-ванць и корхтай:

— Тятнень тага кие вятезень?

Кивок аф кашторды. Сембонь тифтень-тифтень кизефнезень, кивок аф содасы, кие вятезень. Фкя шяйтанць мярьги:

— Аш ётксонк храмойсь, эряви ся кизефтемс.

Тердезь сянге. Сувась храмойсь — ёмла шяйтаннясь. Оцюнясна кизефнесы:

— Тон, штоли нятнень тяза вятить?

— Мон, — отвечась храмойсь. Оцюнясна кодак пешкоды:

— Архт, храмой чёрт вятить меки, коста туйть!

Храмойсь лихтезень цёрать мархта стирть меки лангу и мярьгсь:

— Арда куду, да ванода, меки тяда сашенда!

Састь синь куду. Рьвянясь корхтай:

— А то тейнть ашезь вятев, вага тинь цёрантте. Атять мархта бабась кенярдсть, да давай рьвя-нять палсемс. Тяфта синь кармасть меки марса эряма. Цёрась, виде, первай, коль таколдсь кол-дуттнень ёткс, но ничего, сяльде тонадсь.

Рассказала в 1972 г. жительница д.Поповка П.И.Шуляева, 1912 г.р.

Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений".

Мокшанский фольклор Зубово-Полянского района

На первую страницу

Hosted by uCoz