Солдат

Фкя солдатсь служась 25 киза. Сонь нолдазь куду, а эста яксельхть аньцек ялга или алашаса. Цёрать ярмаконза ашельхть, и сон сась ялга. Мольсь, мольсь, сатозе сонь весь, удомс ашель ко-са, маласа веле ашель, сон сувась калма лангу и мадсь калмотнень турке. Сась пяле весь, и калмось явовсь кафту. Тоста лиесь колдунць и тусь лиезь. Солдатсь сувась калмоть потмос и мадсь. Кафтошка чаетта меле сась колдунць, калмоц заняф.

— Листь, — корхтай колдунць.

Цёрась корхтай:

— Аф лисян! Азонтк, коза якать, лисян!

Колдунць корхтай:

— Фкя оцязорсь рьвяяфтсь цёранц. Мон сивине цёранек — рьвянек.

Цёрась азонтфтозе, кода сивозе. Корхтай:

— Шокшине верснон и марайне алкедь потмос. Тя-тя бокти путыне цёрать веронц, тя-тя бокти — рьвянять. Штоба живолгофтомс, эрявихть синь вадендемс тя верть мархта. Цёрась стясь калмоста и лисемста керсь колдунть щам бокста лоскод.

Сась шобдавась, цёрась мольсь ся ошти, музе ся оцязоронь кудть и анась удома. Тяса корх-тайхть:

— Кодама удома? Тяса цёраньке-рьвяняньке вдруг кулость.

Цёрась корхтай:

— Няфтесте тейне больноентень.

Цёрати корхтайхть:

— Коза ни тага тон эцят, тяса цебярь врачт сашендсть, мезевок ашесть тие.

А тя сяконь содай:


— Няфтесть, да няфтесть.

Сявозь цёрать и няфтезь кулотнень. Цёрась лихтезе народть, ванозе пянакудть, тоса, виде, каф-та алхт. Сявозе фкя алть и кармась цёрать шовсема. Шовсесь, шовсесь, шовазе сембе верть. Ушедсь шовсема стирть. А цёрась ся пингть панжезень сельмонзон и ваны. Мзярс стирть шов-сезе, цёрась стясь и озась. Сяльде стясь стирське.

Цёрась тердезень тядяснон-аляснон. Сят ваныхть и эсь сельмозост аф верондайхть. Тяда меле тисть оцю гульба и кармасть цёрать гуляндафтома. Но мувсь тяфтама кяль, кона корхтай: «Тя сон сонць кулофтозень женихнень-рьвянятнень». Цёрать пякстазь, аф андсазь сонь, аф симдь-сазь. Цёрась корхтай:

— Нолдамасть, мон сембонь азондса.

Сонь нолдазь, тя вятезе народть калмоть лангс. Таргазь калмоста кулоть, ванозь, виде, тоста сявф лоскодсь. Тяда меле цёрать кармасть гуляндафнемонза. Оцязорсь макссь ярмакт, озафто-зе алашати и солдатсь тусь куду.

Рассказал в 1971 г. житель д.Поповка Д.Л.Шуляев, 1910 г.р.

Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений".

Мокшанский фольклор Зубово-Полянского района

На первую страницу

Hosted by uCoz