Сеелень гальцят

Эрясь-ащесь фкя козя купец. Ульсть сонь колма стиренза. Кафттнень сявозь рьваксс, аньцек топодсь теест кемгафксува киза. А колмоцесь илядсь и коданга аф туви сяс, мес сон ульсь пяк анелька, афольхце кулхцонда эсь родителензон и бокста ломаттнень. А стирсь ульсь мазы ша-мас, панчфокс ащель. И весть фкя ашу цёра тядянцты корхтай:

— Тядяй, архт кизефтьк, может, моли тейне рьваксс.

Фкя шиня тядясь тусь купецть шири. Аф ламос корхтамада меле сон азондозе, местема сась. Купецсь корхтай:

— Мон стирезень максса, кда цёрацень улихть сеелень гальцянза.

— Стапт аш, — отвечась бабась.

— Ну кда аш, то стирьтьке аф максса рьваксс, — азозе купецсь. Бабась тусь куду афмяль-вельде.

— Ну кода, тядяй? — Кизефтезе самок цёрац.

— Кда улихть цёрацень сеелень гальцянза, — корхтай купецсь, — сяльде максса стирезень. А мон цёрай мярьгонь, што аш тонь стама гальцятне.

— Архт мярьк. Сонь кафонцт.

Бабась эстокиге тусь ласькозь купецть шири и корхтай:

— Цёразень стама гальцядонза кафонцт.

— Вов тяни, пожалуйста, может сватондамс, — отвечась купецсь.

Ашу цёрась аноклась мезец ули и пяле ковшкада меле тись свадьба. Тяда инголе кузенцяса тифтсь аф оцю узерня и ушедсь каннемонза перьфсонза, нльне утцесь мархтонза.

Фкя шиня синь моркшть ваксса керсесть тарелкати сивольнят — ушедсть ярхцама. Катось мадянц венптезе и мялецоль саламс сиволень пакшкя.

— Лоткак, мярьгонь, салсемда, ату мон тонь тонафтте, — уркстозе цёрась. Катось тага мадянц венптезе. Алясь таргазе узеренц и цопадезе мадянц.

— Мярьгонь вдь, тяк кяжияфне азорцень, бта аф содасак монь промозозень! Стирсь ваны цёрать лангс, а сонць арьси: «Ва тя повонь!»

Аф лама пингта меле вазыясь тракссна. Тракссь кармась мукснема вазняти, а цёрась теенза:

— Лоткак, мярьгонь.

Тракссь кафксть паразевсь, колмоцеда, — сяньге прянц керозе. Но авать мархта лац эрясть, вестьке ашезе урксне.

Фкя шиня срхкасть миртть-рьват атянь куду инжикс. Састь купецть лия стирензовок эсь мирдьснон мархта. Кармасть симома и рахсема ашу цёрать эса, конань пильгсонза ульсть карьхть.

— Давай 100 цалковайда спорятама, кинь сяда кулхцонды авац! — пшкядсь купецсь, конанди максфоль оцю стирсь.

— Давай, — мярьгсь омбоцесь.

— А монь фкя цалковаезевок аш, — пшкядсь ашусь. Атявозец венептсь шрать алга 100 цалко-вай и корхтай:

— Споряк, ов, мархтост. Ашусь согласиндась.

— Полай, комак пильгозон и паламак моньценьге, — корхтай фкясь козятнень эзда.

— Тьфу, дурак, алязень инголе аф виздят! Омбоцесь тердезе аванц и корхтай:

— Кда кельгсамак — паламак!

— Ворьтть, визьксфтома, сильган шамазт! Очередсь сась ашути.

— Комак пильгозон! — строгайста мярьгсь аванцты. Авась комась и палазень карьбрянзон.

— А тяни моньцень паламак!

Стирсь палазе, а на козятне выныхть, келептезь сельмоснон.

— Ну, ов, аф стак мярьгихть, улихть сеелень гальцятне, молодец. Сявить сембе ярмакнень, тинь сембе аф машттада рьвянтень кирдемост, — мярьгсь атясь.

Атявозсь ашу цёрати максозень сембе ярмакнень, нинге максозе инь цебярь алашанц пирьфс-тонза и прважазе куду. А ня козя овотне визьксть эзда ворьгодсть сяка пингоня. Тячемс эряй ашуть мархта колмоце стирец, и вестьке аф эряй сялдондомасна.

Из книги : Б.Ф.Кевбрин, В.И.Рогачёв, А.Д.Шуляев "Живая память поколений"

Мокшанский фольклор Зубово-Полянского района

На первую страницу

Hosted by uCoz