Прошась-оцязор

Фкя царстваса-государстваса, самай сянь эса, конань эса эрятама минь, эрясь бабаня. Сонь ульсь фкя ажа цёрац, конанц лемоц ульсь Проша. Прошась ульсь пяк вии, и сонь карше-зонза ашель модать лангса аф ломань, аф жувата, аф зверь, конань ба сон афолезе шав куломс весть цяподезь.

Прошати ульсь сембоц комсь киза, а сонь ни сотцезь сембе масторонь оцязорхне, и ульсь сон ма-зыхнень ёткстонга инь мазыдонга мазысь. Рьвакс моли Прошанди ашель лишь сяс, мес Про-шась ульсь пяк беднай. Куднясна синь ульсь анцяйняй фкя вальманяса, а жуватасна кодамо-вок ашель. Прошась тядянц и эсь прянц трякшнезе эсь вийсонза, работакшнесь козя ломань лангс.

И вов фкя времаня апак учсек и апак тернек Прошань кудняс сувась омба масторонь оцязорсь и корхтай Прошань тядянцты:

— Мон сисем мода вельф эсь царствастон, эсь монцень государствастон мархтот, бабаняй, корхнема, тевонь латцема сань.

Бабанясь эстокиге пяк эводсь и аф содасы, мезе пшкядемс и мезе инголенза тиемс.

— Оцязорняй, тряйняй-аляняй, мезе тият мархтон, сянь и тихть, хоть живойста модас калма-масть, и минь тонь лангозот аф кепоттяма аф кядь, аф пильге.

Оцязорсь ваны, што бабанясь пяк эводсь, и мольсь тейнза, озась ваксозонза и кармась кизефне-ма:

— Кода эрятада-ащетяда и кода трякшнетяда пря?

Тянь каршес бабась сембонь азондозень рядом-ладом и няфтезе Проша цёранц.

— Шкай ваны цёранязень, конац щасамань и трясамань эсь вийнясонза. Эстокиге оцязорсь шаштсь сяда малас бабанять ваксе и кизефтезе:

— Афкукс ли, бабай, тонь цёрацень тяшка вийц, што каршезонза кивок аф кирди?

Бабанясь азондсь, што аф шнасы, аф еялдсы сонь, а козя ломаттненди тефт тии: таркси корян-нек шуфтт, тумот, конатненди вете-кота сяда киза, ровналгофни паксят; а лияета, коса лашма, тоза шашфты бугор.

Оцязорть стясь пря шяярец.

— Аф мон лишь колганза кизефнян, а сембе масторонь оцязорхне ерхкеихть сама варжамонза, кодама тон цёра шачфтоть-касфтоть. Но мон ётайне синь сембонь и сань сембода инголи. Сань мон, бабаняй, цёрацень инкса и ёраса еявоме эсь царствазон, монцень государствазон служама и цебярь тевонь тиема дворецозон. Мон сонь эряскофтса, андса, симдьса и тонафтса цебярь тевс, а тондейть, кельгома бабаняй, тифтян цебярь куд и раман тейть жуватат, карман трякш-немот и щакшнемот мянь куломозт.

Ламос бабась изь латце оцязорть мархта, ужяль ульсь пяк явомс тяка цёранц мархта, но кода аф кода ладявсь, и оцязорсь ладясь кизоти весть нолнемс цёранц куду. Прошань эстокиге наря-жазе оцязорсь ускф щамса, и Прошась тиевсь нинге сяда мазыкс. Сонь ильхтемонза оцязорсь кочказень сембе эряйхнень шачема веленястонза и тись прощандамань пир. А омбоце шиня шобдава панцть Прошань вальманц алу кильтьф тройка алаша, и оцязорсь озафтозе Прошань эсь ваксозонза и цяподезень алашатнень шинь стямать шири, нльне кивок исцень няе, кона пя-ли пувордасть, кона шири кяшевсть.

Оцязорть шири пачкодсть шумбраста. Сяка шиня Прошать эряскофтозе лия щамса и кадозе вай-мама кемонь шис, кемонь вес. Кемонь шида меле Прошать кучезе войска мархта тюрема сосе-донь оцязорть каршес. Прошась эсь вийнц корява тифтсь эстейнза сабля. Войскатне тюрема тусть сяда инголи, а Прошать оцязорсь кирдезе дворецнень эса, кочкеесть Прошань алу цебярь алаша. Мзярда Прошась сатозень войскатнень, синь эздост лядсть аньцек командирсна и ке-моньшка солдат, а остаткатне ульсть шавфт-тапафт. Прошась пяк кяжиясь и эцесь ськамонза тюрема лама тёжянь солдат каршес. Тюрсь сон мархтост колма шит и колма вет апак ваймак, апак удок, апак ярхцак, апак сипть. Тапазень сембе войскатнень, тапазе сембе оцязорть дворе-цонц и сембе эряйхнень, конат ульсть соседонь оцязорть владенияса. Мрдась Прошась сизеф-ста, апак удок, эсь оцязоронц шири. Сяда меле изь яка тюрема ровна пяле киза, сяс мес сонь эз-донза кармасть пелема сембе оцязорхне, и война кивок изь срхкафне.

Тядянц эзда Прошась получась колма сёрмат, конатнень эса пеняцяй оцязорть лангс, мес сон тейнза мезьсовок аф лезды. Эста Прошать пяк кяжиясь потмоц, сявозе ружьянц, конац тейнза максозе оцязорсь храбрайшинкса, и срхкась тума куду. Оцязорсь пяк кирнезе Прошать и корх-тась тейнза:

— Тисайне сембонь, мезе ульсь корхтаф, а тяфтак аф лядат. Дай мамацень усксаськ дворе-цоненди, и кармай симома-ярхцама, мезьда минць. Тямак када, ату юмай сембе честезе, слава-зе, и монь тапасамазь, равжа модакс тисамазь. Тят тушенда, максса монцень родной стирезень тейть рьвакс и максса царствазень-государствазень пяленц.

Прошась яфодезе сембонь лангс кяденц, сявозе ружьянц и тусь, нльне изь пшкяде оцязорть кар-шес. Прошась куц шири мольсь колма шит и колма вет апак удок, апак ваймосек, апак ярхцак. И вов лиссь сон фкя веленяс, сувась ваймама крайста кудняти. Тя куднять эса эрясь сире баба стиренц и уноконц мархта. Прошась эстокиге кайсезень лангстонза щамонзон, штась-нардась и срхкась озама ярхцама, но ярхцамбяль кяжень пачк мархтонза мезевок ашезь сяв. Бабанясь, конанц шири лоткась ваймама, ульсь колдун, сон эстокиге шарьхкодсь, што Прошати ярхцамс аф мезьда, каясь тейнза лям, лофца, макссь сиволь и давай каванямс Прошань эса и кармась кизефнема:

— Коста саят, ков молят и кият тон?

Прошась корхтай:

— Васенда андомак и макет мондейне васта ваймамс-удомс.

Бабась стане и тись. Учезе, кодак ярхцась Прошась, и матозе ляпе васткас. Удось сон пяк куватьс и пяк кемоста. Тя времать бабать стирец Ольгась и корхтай тядянцты:

— Эх, тядяй, кодама сон мазы, вов кда мондейне тяфтама мазы мирде!
/
А бабась корхтай:

— Тят пичеде, стирняй, мялезт ули, тонь мамаце тисы сембе тевть, и сон ули тонь мирдце.

Бабась эстокиге еявсь васомбеельхть и Прошать прястонза керсь шяярнят, а вельхкесонза ме-зебди мторфтсь эсь потмованза, тоса мольсь стиренц малас и стама жа пакш керсь Ольгань пряста и тага мезебди мтордсь эсь потмованза. Шяярьхнень шорязень марс, ашкодозень лос-коткас и калмазень вири кемгафтува рашкеа тума алу. Мзярда бабанясь сувась куду, ваны, Прошась и Ольгац ащихть ряцок озада и корхтакшнихть кельгома баснят, а синць фкя-фкянь каршес пеедихть. Бабась ваны, што тевсь тиф пяк лац и удалась, сон изь карма сяда лама кол-давакшнема и нльне истце кизефне, коста сай, коза моли и кие сон тя Прошась.

Омбоце шиня Прошась куду изь ту, а лядсь бабанять шири. Кудса ащемс мольсь мялец, цёрась сявозе ружьянц и тусь охотас. Якась сон пяк куватьс, ётазень сембе шяйхнень, болотаттнень, но мезевок изь шава. Шоподема малати тусь куд шири. Ваны, ащи якеярга, ляцеь якеяргть лангс, ранендазе сонь. Прошась эстокиге тусь мельганза кундамонза, но якеяргсь изь мув, и Прошась эрьготсь болотать кучкас, коданга аф лисеви.

Куватьс сон шарондсь эзганза, а тоса варжакстсь инголенза и няйсь коське киня, лиссь тоза и ваны: ащи кудня. Пачкодсь куднять малас и сувась эзонза. Куднять потмоса ащихть лазкет, а лазкенень эса уды стирь, шяяренза нолдафт лазкеть кувалма и токсихть цють аф кияксти. Стирсь ульсь пяк мазы. Прошась васенда эводсь и меки потазь кармась лисема, но стирсь ке-нерсь панжемс сельмонзон, няезе Прошать и корхтазевсь:

— Эх, пара цёра, кодама тонь шкай кандонзе, кодама тонь шкай тяза вятензе? Тонь тяса сиф-тядязь, тифтень сускомня нефттядязь и афи ули кулице, аф ули содайце, коса наксады буйнай пряняце. Но тят эводе, пара цёра, монь валнень эзда. Сяда курок кулхцондомак, а нинге сяда курок тихть, мезе мон тейть азан. Молят куду, вешть стама книга, рамак кемгафтува штатол и сак сей меки. Васендакиге тяштят лазкенень перьф круг, крьвястьсайть кемгафтува штатолх-нень, а тонць озат прязень пес и морафтсак книгать педа-пес. Кда тисак тя тевть, мон улян тонь аваце, а тон улят тон мирдезе-спасителезе. Мзярда кармат морафтома, куднясь пяшкоди аф цебярьда, и мезе аф кармайхть тиендема, тон синь тяйть кулхцонда и тят варжаксне шире-зост, а морафтт и морафтт. Монь лемозе, пара цёра, Юля, алязе оцязор, а мон улень сонь тяка стирняц, а монь аф цебярьсь саламань и тя кудняти кяшемань, тя лазкененди путомань. Вов курок топоди колма кизот, кода мон тяса ащан, а колма кизот топоди сисем шида меле. Сисем шида меле сон сай, еявсамань рьвакс, и мон улян аф цебярьть авац. Юмай-арай монь од пряня-зе, мазы шинязе. Мондейне сембоц топоди кемгафксува киза, а мон цебярьста светтке аф сода-са. Мон тейть эняльдян, кода шкайнди, мезе мон тейть азонь. А тяни сяда курок кенордак, листь тяста, ату малаткшни пялевесь. Куду тонь кице, пара цёра, кодак лисят кенкшкять эзга, види кядь пяли.

Прошась мольсь куду пялевети. Кудса кивок изь уда.

— Куватьс якать, куватьс шяять и мес-бди мезевок ашеть шава, — мярьгсь бабась.

— Эх, бабай, вирти эцень, киттнень-яттнень аф содасайне и эрьгодень, цють лисевонь.

Шобдава ранакиге Прошась стясь, штась-нардась и тусь велева. Фкя ломань ширде добувась книга, рамась кемгафтува штатол и тусь видеста стирть тейс, нльне изь лотка бабанять шири. Кодак сувась Прошась кудняти, Юлясь кенердсь, нльне пяле видес кеподсь лазкснень эзда. Прошась тяштсь лазкснень перьфке круг, крьвястезень штатолхнень, озась Юлять прянц пес и кармась морафтома книгать эса. Кодак кармась маласькотькшнема пялевесь, панжевсь куд-нясь, кеподсь поталаксь крышанек-мезнек. Куднясь пяшкодсь аф цебярьда. Аф цебярьхне ти-ендсть кие-мезе маштсь: вяшкихть, кургснон калафнесазь, пулоснон кепсесазь, аф эсь вайгяль-сост ювадихть: «давайте тя цёрать сязендьсаськ, нефтесаськ тифтень сускомня». Ламоксть врьгятькшнесть фатямс Прошань, но коданга исть ётнев кругть вельф. А Прошась пря аф кепо-ди, морафты и морафты книгать эса, тиенди стане, кода тонафтозе Юлясь. Пялеведа меле сем-бе юмасть, кати-куваня лиендсть и ворьготькшнесть, а куднясь ащесь станяк.

Морафтсь сон тяфта колма шит и колма вет. Вов шумордазе книгать морафтомда, и Юлясь стясь лазкснень эзда и корхтай:

— А тяни мон тонь авацян, а тонь монь мирдезят.

И эстокиге Юлясь ашкодозе Прошать кргада. Кармась эсонза кемоста палсема и кенячрдем-бачк авардема. Сельмоведьсонза штазе Прошать шаманц. Куднять эзда лиссть и куватьс якасть ляйть беряков, думандакшнесть, кода пачкодемс Юлять алянц шири. Юлясь тусь ськамонза, а Прошати надияфтсь:

— Сак колма шида меле тяка берякти, тяка вастти, мон саян инксот пароходса.

Юлясь озась венчс и тусь ведть эзга, а Прошась тусь бабанять шири. Цёрась мольсь аф весялас-та, пряц нолдаф и кемоста думандась. Лоткась ярхцамда и симомда. А бабась кизефнесы:

— Мес тон, Проша, аф ярхцат, аф симат, коза юмсеть?

— Якань мон ярмаконкса ся оцязорть шири, конанцты служендань, но сон монь панемань, а яр-макт изь макса. Вов сяс мон аф вееялан и думандан, кода пачкодемс тейне куду, варжамс сире мамазень.

Ольгась и бабась сонь верондазь, бабась корхтай:

— Проша цёрай, рьвяяк монь стирезень лангс, мон тейть максан ярмакт и золотат. Кармат уле-ма азор монь кудсон.

Прошась изь атказа и изь макса согласия рьвяямать колга, а прась кроватть лангс и кемоста матодовсь. Кафта шит сон удось-ваймясь и аньцек стякшнесь ярхцама. Колмоце шиня сявозе ружьянц и тусь охотас. Бабанясь кучезе мархтонза уноконц — Максимть, конанцты надияфтсь: Прошать мельге ваномс, коза якай, коза юмси.

Прошась пяк исце еявонде Максимть мархтонза, а бабанясь мезе изь тиенде, а сякокс кучезе Прошать мархта. Прошась, васендакиге, мольсь ляйть берякс, коса явсть Юлять мархта, озась ся вастти; куватьс-куватьс ваймосесь. А Максимти корхтай:

— Ванды мархтон тят сашенда, мон туян охотас ляйть омба бокс пяк ичкози, а тоса пяк лама зверьда, конат тонь апак стрядондак сифтядязь, а мондейне инксот эряви максомс ответ.

Ваймамда меле Прошась тусь охотас, охотац пяк удалась. Сон шавсь сняра нармонь и зверь, ко-нат афольхть усков цебярь алашаса, а сон кандозь кандозень. Максимсь семботь азондозе, мезе корхтась Прошась. А бабанясь колдавась булавканя, максозе Максимти и корхтай:

— Кда кармай тума ичкози, еялк тя булавкать щамозонза, и сон матодови.

Вов варьхмодсь. Прошась ерхкай охотас пяк вееяласта и думандай эсь пачканза: «Тяни монь инксон пароходса сай Юлясь и мон туян мархтонза». Максимсь эстокиге корхтазевсь:

— Мон мезьдонга аф пелян и молян мельгат: ков тон — тов мон, тон толти — мон мельгат. Прошась лангозонза варжакстсь пяк кяжиста.

— Мархтон тячи тят яка, а ванды сяфте и максса тейть ружьязень, кармат тонафнема ляцен-дема.

Максимсь кудса аварьгодсь, а бабанясь эстокиге:

— Мес тон сонь пяк обижасак, сон тонь пяк кельктанза, еявк мархтот, сон тейть аф кармай шорсема, ули корхтай ялгаце, вирть эзга якамста кафоненть ули сяда вееяла, еявк, тяк кадон-да. Эряскотт, тят аварде, сяфтянза.

— Ну, аде, а кда сизят, сяван или и шафте цебярьняста, мон тонь тонафтте, кода яксихть оцю аля мархта. Аде сяда курок.

Пачкодсть ляйть берякс, сяка ваетти, коса ваймосесть исяк, Прошась корхтай Максимти:

— Кармай сама пароход, тон ворьготть и кяшть, а мон кяшан тязк, тишенятнень потмос.

Максимсь ладясь. Ётась аф лама врема, ваны — уи пароход. Пароходсь изь пачкоде тейст вай-гяльбешка, Прошась прась боком и корхтай Максимти:

— Мон лядан тязк, а тон сяда курок кяшть вирти. Тя пароходть эса уихть разбойникт и тя беря-ку кяшендихть лама добра, ярмак, золота.

Максимсь салаваня щафтозе булавканять Прошать щамс, а сонць ворьгодсь и кяшсь вирти.

Вов пачкодсь пароходсь Прошать уторе и пувордась берякти. Пароходть эса морай музыка, сем-бе кшнийхть, морайхть, пяк лама ломаньда, и сембе наряжафт. Максимсь сельме аф сёлги: ва-ны мельгаст, мезе тиендихть. Сембода инголи ласьки мазы стирь, няезе Прошать боком тишеть лангета и ювадсь сембонди:

— Сада тя пяли, монь мирдезе-спасителезе тяса!

Кодак пачкодсь Прошать тейс стирсь, кенярдембачк изь стрянда, што Прошась кемоста уды, и кармась эсонза палсема. Инжихне стряндасть, што Прошась аф стяй, стряндась и стирське. Щу-пазе теланц, ваймонц и корхтай: «Сон живой, но мес сон тяфта пяк кемоста уды?» Куватьс эсонза стяфнесть, куватьс перьфканза шарондсть, а Прошась сембе сяка удось. Мазы стирсь прась мяштенц лангс и куватьс авардсь — ольксесь Прошать шаманц вельксса, нльне Прошать шаманц штазе эсь сельмоведьсонза. Мазы стирсь маштсь ёжеда, и сонць цють аф кулокс тар-гавсь кувалмонза. Стирть эстокиге еявозь пароходти. Инжихне аф куватьс ащесть сяда меле Прошать ваксса и ерхкасть тума. Ласьксь тага мазы стирь и сёрмадсь сёрманя, навазе Прошать зепс. Таргазе келенянц, валхтозе сурстонза сурксонц. Тяньге путозе зепозонза, палазе и тусь па-роходти. Пароходсь берякть эзда аердсь вайгяльбешка, ласьксь Максимсь Прошать тейс, тарга-зе булавканять, Прошась ергозсь и тусь ласькозь пароходть мельге берякть эзга мянь снярс, мзярс изь кяшев пароходсь сельмоингольденза. И аньцек эста мрдась куду.

Максимсь куду мольсь сяда инголи и сембонь азондозе бабанцты, мезе няйсь и мезе тиендевсь Прошать мархта. Бабанясь шназе уноконц и тянкса пидесь тейнза кафта алхт.

Прошась куду молемста таргазе зепстонза сёрманять, конань эса ульсь сёрматф: «Кельгома монь мирдезе и спасителезе! Сашендонь мон инксот, сашендсь алязе, тядязе и сембе радняне, а тон удоть и мезьдонга изеть стяфтов. Ванды тага саят инксон, ульхть тязк. Кадса тейть сурк-созень и руцянязень».

Прошась куду сась аф вёсяла и кяжи. Ваны — Максимсь ащи кудса. Лихтезе сонь ушу.

— Азк мондейне, мезе тон няеть и кит сашендсть?

— Мон мезевок изень няе и мезевок изень куле: мон кяшендень веляфтф тумонь корянь аля. Мон изень кенере ласькомс тейть, а ворьгодеть монь эздон и кадомайть ськамон. Мон пяк пелькстовонь и тунь ласькозь куду. Бабазти мезевок изень азонда. Кизефтезе кядьстон, коза мон тонь кадыхтень, мон тейнза азыне, што велеть пес и курок саят куду.

— Кда тяфта корхтать — раман вандыкиге тейть кямот.

Прошась сувась куду и велясь кроватть лангс, удось мянь шобдавати. Шобдава ранакиге тага ерхкась охотас. Максимсь эздонза коданга изь ява. Бабась пяк изь ноля Прошать эса:

— Тят яка, тяйть шавонда пилькнень, тяк мученда пряцень, улихть якеяргоне, мацине, печк хоть кемонь эздост, пуштсайне-рястасайне, ярхцак.

— Аф, сембе сяка мон туян, мон вайме аф таргаван вирьфтома, охотафтома. Молян тячи вирть потмоста муян цебярь васта и путан тоза куц, — шаркстась, кяжиста хлопадезе кенкшть и тусь вирть шири.

Вишкста якась вирть пачк, цють аф ласькозь ласькондсь шяйхнень — болотатнень. Максимсь эздонза коданга изь ляда. Састь тага сяка вастозост, ляйть берякс, велясть ряцок тишетнень — панчфкятнень лангс. Аф куватьс Прошась корхтакшнесь Максимть мархта, и апак стряндак марязь музыкань вайгяльть, варжакстсь ляйть шири — пяле вайгяльбешка эздост уи пароход. Прошась аныдек кенерсь пшкядемс Максимти:

— Тон архт кяшть сяда вирь потмос, а мои кяшан ня кальнятнень потмос.

Максимсь шаркстсь, щафтозе булавканять, Прошась матодовсь, а Максимсь кяшсь сяда мала-няс. Пароходсь пачкодсь берякть малас, валгондсть эздонза тага сяка ломаттне и сяка мазы стирсь. Ваныхть Проша тага уды. Куватьс Прошать перьф мучендасть, куватьс эсонза стяф-несть, но мезевок тага ашезь лисе. Юлясь прась куломс, и сонь кядь лангса кандозь пароходть потмос. Юлять аляц сёрмадсь записканя: «Ванды сатама мекольцеда». Озасть сембе пароходти, сембе ризнайхть, сембонь нолдафт прясна, музыкась аф морай, юмась сембе весялашисна ин-жихнень.

Пароходсь тусь Прошать теиста пяле вайгяльбешка, ласьксь Максимсь, таргазе булавканять. Прошась сргозсь и ласьксь берякть эзга пароходть мельге сельмеингольденза кяшевомс.

Прошась мрдась меки сяка вастозонза. И молемстонза думандай: «Мее тяфтане, сембонь маря-сайне, сембонь кульсайне, а валозе аф азови, и аф стяван. Тяса тевсь аф стак, ванды, мезе аф тиендян, Максимтъ мархтон аф еявса». Пачкодсь сяка вастозонза, коса удось. Максимсь учси эсонза.

— Эрь, азонтк, мезе няеть.

— Няине, кода сашендсь пароходсь, и эздонза пяк лама валгондсь ломаньда, а ётксост ульсь пяк мазы стирь, конац ласьксь тейть и прась ваксозот, а тяса сонь еявозь, кандозь меки пароходти, а мельганза озеесть сембе, конат валгондсть. Пароходсь тусь. Мон лисень и ласьконь тейть, но тон эздон ворьгодеть. Вов мезе мон няень и, мезе корхтасть, изине куле.

— Тя пароходсь сашендсь монь инксон, а тя мазы стирсь авазе. Азк бабацти, мон кафта шида меле туян, и азондк, мезе няеть, а тяни аде куду.

Куду пачкодсть, мзярда шись шоподсь. Прошась изь карма корхтама, аф ярхцась, аф симсь и ис-цень кайсе лангстонза щамонзон, мадсь кияксти. Веть сргозсь ранакиге, кудть эса сембе удость, салаваня еявозе ружьянц и лиесь кудть эзда. Тусь тага ляйть берякс. Учема вастонц сон бе-рякть эса полафтозе. Сргозсь бабась, стряндась — Прошась аш, эстокиге стяфтозе уноконц и кучезе Прошать вешема и кемоста уноконцты надияфтсь: «Мезе тят тие, а мук, аф мусак — пряцень валхтса». Максимсь цють аф лиезь ласьксь ляйть берякс, коса Прошась учезе паро-ходть, Прошась тоса ашель. Лама вастова ласькондсь Максимсь и тага ласьксь берякти и ваны, уи ведть эзга пароход и аф пяк ичкози ни берякть эзда. Сонць кяшенди, а сонць приметни, аф няйсы ли коста Прошань. Пароходсь шаркстсь берякть шири, музыкась эсонза морай — пандсы сембе вирть. Варжакстсь Максимсь берякть кувалмос — берякть крайса тишетнень потмоса стяф Прошась и яфии картузеонза пароходть каршес. Пароходть эзда сембе сонь няезь, сембе кенярдсть, а Юлясь, сяконь ватт, комоти ведти, кодак няезе берякть эзда Прошать. Максимсь салаваня, кяшендезь тишетнень потмова, кальнятнень пачк, пачкодсь Прошать фталу и сялго-зе булавканять. Прошась кода кула ломань прась и матодовсь мазы панчфнень — тишетнень потмос, а Максимсь сонць сяда курок кяшсь. Пароходть эзда валгондсть сембе инжихне. Юлясь кенярдембачк ласьки, сонць пракшни, а кодак пачкодсь Прошать тейс, ваны — сон тага уды, и прась ёжефтома турксканза, а сонць аф эсь вайгяльсонза олькси-аварди. Састь мархтост док-торхт, конат щупасть, варчеесть Прошать эса и мезевок сембе сяка исть тие. Юлять еявозь кядьлангса пароходти, и сембе инжихне сувсесть мельганза. Синь сембе ульсть ризфса и оцю думса: мезенкса и мес тяфта? Пароходсь тусь. Прошась илядсь.

Ласьксь Максимсь, таргазе булавканять, Прошась сргозсь. Ваны — пароходсь маласа. Сон мельганза ювади, яфии, но вайгяленц кивок аф марясы и кивок сонь аф няйсы, сембе инжихне ульсть пароходть потмоса и ризнасть. Прошась ласьки берякть эзга и ваны, берякть трваса ащи калонь кунцема венч. Сон озась эзонза и тусь пароходть сатома. Уйсь шобдавас пароходть мель-ге и пачкодсь, коза лотксихть сембе парохоттне. Сувась столоваи, кизефтсь ярхцамс-симомс и кизефтезе, лотксесь ли сей пароход, конанц эса мольсь оцязор.

— Лотксесь, и вов тяса симсть — ярхцаеть аф кунара, урядайне мельгаст моркшнень.

Прошась кенордазь симсь-ярхцась и тага тусь пароходть сатома. Куватьс сон уйсь и тага пач-кодсь, коза лотксихть парохоттне. Лоткась Прошась тоза ваймама и сувась столовайти, вешсь ярхцамс-симомс и кизефтезе:

— Лотксесь ли тяза пароход, конанц эса ульсь оцязор?

— Лотксесь и вoв тяса симсть-ярхцасть, и вона аньцек шуморяйхть нарнемс-урядамс моркш-нень эса. Аньцек аф кунара тусть.

Прошась кенордазь симсь-ярхцась и тага тусь пароходть сатома. Шобдавать лангса тага пач-кодсь, коза лотксихть парохоттне, лоткась ваймама тоза Прошаеь. Сувась столовайти, вешсь ярхцамс-симомс и кизефтезе:

— Лотксесь ли сей пароход, конанц эса уйсь оцязор?

— Да, лотксесь, мельгаст нльне апак урядак моркш лангське, и вона ащи пароходсь, конань эса синь састь.

Эстокиге Прошаеь кизефтезе:

— А косот синць, ков тусть?

— Синь, пара цёра, тусть толонь пандть тона бокс орёл лангса, а тон мельгаст тяни аф ётават, и тейть синь аф сатовихть. Ули синь тяса фкя сире-сире орёлена: сонь кадозь сяс, мес аф ётави тона бокти. И лядсь синь тяза фкя ломаньцна, конац яксекшнесь орёлхнень мельге.

Эстокиге Прошаеь тертьфтезе тя ломанть, азондозе сембе тевть, кода ащи, азондозе, кие сонць и местема моли оцязорть шири. Орёлонь андысь изь атказа и максозе орёлть Прошати.

Прошась тумстоза тифтсь эсь виенц корява дубина. Озась орёлть лангс и тусь лиема толонь пандть вельф.

Аф лама илядсь ётамс толонь пандть вельхкека, варжакстсь Прошась фталу, фталдост няйсь мезе-бди равжа, конац уезь уйсь мельгаст, а эздонза лийсть толмархт. Прошась и корхтай орёл-ти:

— Мезе шта тяфтама лии мельганк?

Орёлсь пшкядсь ломань вайгяльса:

— Тя лии сембонь лангса оцю аф цебярьсь, и сон минь нильсамазь-сивсамазь фкя кургса.

— Кенордак, орёл ялгай, аф лама илядонды.

— Монцьке сембе вийзень нолдайне.

Аньцек кенерсь тянь азомс орёлсь, аф цебярьсь синь сатозень. Сонь ульсь кемгафтува пряц, ульсть панжадот сембе кемгафтува кургонза, а кургонзон эзда ляцеть толмархт. Вов аф це-бярьсь лии Прошать мархта ряцок, а орёлсь Прошать ала эводсь и трнаты. Аф цебярьсь корх-тай:

— Кода, тонць эцят кургозон или васенда тюрьхтяма, и мон тонь сембе сяка сифте, тон салайть монь авазень, Юлять, но тейть сон сембе сяка аф няемс, сон ули монь.

Прошась пяк кяжиясь и корхтай тейнза:

— Лама тон лиендеть, лама тон сивондеть ломаньда, а монь эздон ляпият. Юлясь ули монь.

Аф цебярьсь эстокиге врьгятсь Прошать лангс. Прошась таргазе дубинанц и кармась аралама прянц. Орёлть вийнц маштозь толонь пандть ётазь. Эстокиге Прошась корхтай орёлти:

— Валк модать лангс, и мон сонь шавса и модать пачк нолдаса.

Аф цебярьсь нинге сяда пяк кяжиясь, нльне аф эсь вайгяльсонза пешкоды:

— Тапате, кода карувонь!

И тага врьгятсь аф цебярьсь Прошать лангс. Прошась кенерсь ни валгомс модать лангс, и эсто-киге синь ушедсть фкя-фкянь каршес тюрема. Прошась весть яфодсь, сязезень аф цебярьть ко-та прянзон. Аф цебярьсь пешкоды:

— Дай вайматама!

Прошась корхтай:

— Ваймосемс ули пингоньке. Кодак сязьсайне прятнень, кармат ваймосема шинек-венек пеф-тома.

Яфодсь Прошась омбоцеда дубинкасонза и сязсь нинге колма прят, яфодсь нинге весть — сязе-зень лядыкс колма прятнень и люпштазе модати пачакс: «Вов тяни ваймосек, а мон туян».

Прошась мольсь ляйти, штась — нардась, озась орёлть лангс и тусь ошти лиема, коса эряй Юлясь. Пачкодсь ошти шумбраста. Прошась кизефтезе, коса эряй оцязорсь. И тусь ся шири. Пачкодсь дворецнень инголи, ёрась сувамс эзост, но сонь изезь нолда. Эста сон корхтай:

— Арда азость оцязорти, сась стиренц спасителец.

Аф куватьс сон учеесь кенкшть фтала, и лиесь уторозонза оцязорть радняста ломань, конац со-дазе эстокиге Прошать и фатязе цють аф кандозь дворецти. Кодак сувась Прошась оцязорть комнатас, оцязорсь эстейнзовок аф верондай — афкукс ли тя Прошась или кодама причудия. Тертьфтезе аванц, пуроптезень сембе инжихнень, и сембе содазь Прошать, сембе эсонза пал-сихть. Оцязорсь сявозе Прошать Юлять тейс. Юлясь ащесь эсь комнатасонза, эхярь аварди и юватькшни: коса монь Прошазе? Прошась сувась Юлять комнатас. Варжакстсть синь фкя-фкянь лангс, содасть фкя-фкянь, кундасть кргада и куватьс синь палсесть, куватьс синь авардсть. Юлясь кизефтезе, кода пачкодсь и мес сон удось, мзярда якасть инксонза. Прошась азондозе, кода пачкодсь. А мес удось мянь тячемс сонцьке аф содасы.

Колмоце шиня Прошась Юлять мархта и лама ломань оцязорть радняста тусть Прошать ма-манц инкса. Кодак ускозе Прошась маманц оцязорть шири, омбоце шинякиге тисть свадьба. Кафта кофт симондсть-гуляндасть, кштисть-морасть Прошать и Юлять свадьбаса. Свадьбада меле оцязорсь путозе эсь вастозонза. Прошась — оцязор.

Изь топоде киза, Прошать лангс кеподсть тюрема колма оцязорхт. Лама войскат Прошась куч-сесь. уторозост, но синь ульсть сембе тапафт. Кяжиясь Прошать потмоц, озась сонць эсь ала-шанц лангс, сявозе дубинканц, сявсь мархтонза вете сятт солдат. Шиста сон тапазень колмоць-ке оцязоронь войскатнень. Прошать лангс кеподсть нинге сйда лама оцязор тюрема. Эста Про-шась тусь войсканзон мархта сембе оцязорхнень лангс. Колма недяляста тапась ведьгемонь оцязор, а конат ульсть апак токсект, сят эздонза пельсть и эняльдсть инголенза, штоба синь афолезь токсе.

Рассказал в 1961 г. житель с. Булдыгино М.Н.Савичкин, 1896 г.р.

Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений".

Мокшанский фольклор Зубово-Полянского района

На первую страницу

Hosted by uCoz