Од ава

Эрясть-ащесть атят-бабат кафонест. Синь ульсь фкя стирнясна. Эрясть, эрясь и атять авац ку-лось. Стирнясь корхтай алянцты:

— Аляй, сяфть од ава!

Алясь корхтай:

— Сявомс сяван, да, кади, аф туй мялезт!

— Да, мес аф туй! Муськомнязень муськсы, пищанязень пидесы.

Ну и алясь рьвяясь. Сявсь сон стама ава, конань сонцень ульсь стирец. Од авась сонць мезьге ашезь тинде и стирняцтыге изь мярьгонде работамда. Алять стирняц кармась сембе тефнень тиендема, а од авась коль сюци эсонза. Но тя нинге кржа. Сон пристандась атяти:

— Уск, атя, стирцень баняс, кадок тоса эряй.

А сонць эсь пачканза думандай: «Тоса сонь колдуттне сивсазь».

Атяти аш месендемс — ускозе стиренц баняв, а стирнясь сявсь мархтонза целай усф мушка. Аляц кадозе стирнять баняв, а сонць тусь. Стирнясь сявсь кядезонза мушка и кармась кштирде-ма. Аньцек сась пялевесь, баняв кармасть сувама сюруфне-пулуфне. Стирнясь, конанцты мак-сы тиемс моцькя, конанди — мушка пялькс, сембонди мусь работа. Сонць стирнясь озась куч-казост и кармась азондома эсь эряфонц баснякс. Сюруфне-пулуфне кулхцондсть кургонь пан-жезь, а синць работасть. Аньцек кукорясть атёкше, синь сембе лиссть. Шобдава авась кармась пачань пицема, а сонць корхтай атяти:

— Архт, атя, стирцень уск.

Тусь атясь стиренц инкса, а бабась думандай: «Тяни усксыне стиренц пакарензон». А шрать ала пиненясь кармась увама: «Гав-гув, аказе сай, пяшксе арьзя сюре туй». Авась макссь пиненяти пача и корхтай:

— Тон аф стане морак, а вага кода: «Гав-гув, атязе сай, галдор-гулдор пакарьхть туй».

А пиненясь сяконь содай: «Гав-гув, аказе сай, пяшксе арьзя сюре туй».

Авась ваны: атясь усксы стиренц, алонза пяшксе сюреда. Авась кяжиясь, сон завиндовай атя-ти, мес тяфтама ёню стирец, мес тяфта машты работама. Сон корхтай атяти:

— Уск, атя, монь стирезень баняв.

Атясь озафтозе авать стиренц и ускозе баняв. Стирсь озась и учи. Аньцек сась пялевесь, кар-масть сувама сюруфне-пулуфне. Стирсь кармась мушкса мархтост тюрема, сялондома. Колдут-тне кяжиясть лангозонза и сязендезь стирть палнянь-палнянь.

Шобдава од авась стясь и кармась пачань пидема, а сонць корхтай атяти:

— Архта, атя, уска стирезень, да ватт, тяйть юмафта сюрензон.

Атясь кильдезе алашанц и тусь. А шрать ала пиненясь увай: «гав-гув, атясь сай, галдоргулдор пакарьхть туй». Авась сявсь коцькарга и давай пиненять шавомс, мярьк: «Гув, аказе сай, пяшк-се арьзя сюре туй». А пиненясь сонцень содай. Ваны од авась: усксы атясь аф стиренц, а кяс-кавса стиренц пакарензон.

Рассказала в 1972 г. жительница д.Поповка П.И.Шуляева, 1912 г.р.

Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений".

Мокшанский фольклор Зубово-Полянского района

На первую страницу

Hosted by uCoz