Кужа велень афкуксонь эвотьксне

Атянь атяньконь пингста ломаттне азондсть азкет чудатнень колга роштувань кудса, вирьса пенгянь анокламаса и сёксенда-тялонда карень кодамста. Тяни тя чудатне пачкодсть аф аф-куксонь тиендеви тевкс, а ёфксонь кодяма ёфтамакс, конатнень пяк кельксазь кулхцонкшнемс ёмла шабатне. Пуромихть шабатне сёксень, тялонь кувака иляттнень ётамста кодамовок атянь перьф и ся ушеды:

— Ингольдень эряфеь, шабанят, ульсь пяк стака. Шинек-венек работат, а толк аш, сёроста се-рос кшись аф саты. Семьясь од урожайс педа-пес аф тряви, аф ванови. Шабатне шачихть, ур-маськодыхть — кулыхть. Эчке шуфтонь кряж кеподят — поконнце сязеви, пекста сюлотне аф стане арайхть, кувать еярядят-муцят, кулат. А мзяра ава шабань шачфтомста кулось. Да и сока мать, сёронь урядамать перьф пяк стакалгодат. Пефтома муцямат, нужат, урмат ашкорязь ло-маттнень эряфснон. А лезкс костовок аш. Лезксонди лядондсть аньцек шкайхне, калдазатятне, кудаватне или юрхтаватне и лиятне. Сяс ломанць эрь мезня эняльдсь тя кудаватненди, баняа-ватненди, калдазатятненди-бабатненди. Сярятькстат — эняльдят Кудавати, Кудатяти. Урмась-коды жуватась — эняльдят Калдазатяти — Бабати, сёронь видемста озондат Норовавати, Пак-сявати, пизем аф туй — озондат Атямти и стак тов.

Басняса азондсть: кда Кудавати вастст аф мялезонза, коза путф кудсь — семьясь кода ба афоль старанда лац эрямс, козякодомс — сяка эряй ашуста. Ламоксть ломаттне щярьхкотькшнезь тя Кудавать туфталонц, полафнезь эряма вастснон, кепсезь кудснон лия вастс, сембодонга тоза, коса инголе эрясть кувать и козяста. А кда Калдазавась аф кельксы калдазста жувататнень, кудонь нармоттнень — раштама аф кармайхть, ураткшнихть. Фкя ава азондозе, што сонь куд-пирьфсонза тевсь ашезь моле. Равжа тракссь и лофца лама аф максы и кда вазыяй, вазоц ла-мос аф кирди. Авась мизе тя траксть, рамась лия тюсса, штоба Калдазавати туль мялезонза. И тракссь, мле, кельговсь шкаень аваняти. Эрь кизоня вазыякшнесь вазнят, кудряв понанят, стя-да пулонят и потяфневсь лац.

1. Вов кодама басне тянь колга азондсь Устинья бабанясь.

— Ульсь минь кафта алашаньке. Фкясь акшель, гриваняц оцю, мазы и кувака. А омбоцесь сире и осал. Мазы алашать Калдазавась кельгозе, а осал лиять — аш. Стятама шобдава — мазы ала-шать гривац понаф лама шуваня кесаконяса, ронгоц — копорец ару, чистайня, инголец пяшксе тишеда. А омбоцесь вельхтяф шов потмоса, начка, боконза вадентьфт назёмса, батязе и корх-тай:

— Ватта, Устья, мезе тиендеви и сявк мяльс, кодама жуватат кирдема. Няк, тя вов алашать Калдазавась кармась кельгома, якай мельганза, анни эсонза. А тя алашати покой аф максы, веньберьф панецесы и арни лангсонза.

А меле вов мезе лиссь. Весть батязе пеедеманкса сявозень орадозень сембе касанятнень уря-даф алашать гриваста, а калдазь авась кяжиясь. Шобдава лисеме калдазу и аф верондатама эсь сельмоньконди: кафцьке алашатне уратфт.

А вов лия басне. Тевсь ульсь шобдаста. Сире атя лиссь кудонц инголи, ащесь мзяра-бди пинге и вдруг теенза лоткась нурдс кильтьф алаша. Нурдса озафтольхть кафта алят, конат рузкс эняль-годсть няфтемс кить вирть шири. Атясь кода маштсь, азондозе кить муманц, но тя алятне мярьгсть, што сонтьфтемонза кись теест аф муви. Эряви теенза озамс нурдозост и ардомс кить ваксе. Атясь озась нурттненди плманжа лангс и тусь кить няфтема. Ардыхть алашатне, а ки аф няеви. Ардыхть, а кись аф муви. Кувать тяфта ардсть. Атясь арьси: «Да кись ёфеи маласоль, мес шта аф муви?» а сонць пшкядсь:

— Ох, Господи, мес тяфта?

Ня валхнень азомдост меле атясь лядсь шава вастс ловть лангс плманжа видева. Маласа аф кодамовок алаша, аф кодамовок ломань ашель. А тят ардыхне ульсть сюра и понав шама марх-тотне. Синь ускозь атять Лундан ляйть берякс, ёразь каямс ведень томбати. Но атясь, няк, ин-голдазень синь и азозень шкайти валонзон.

2. Фкя алясь тусь Спасскяи базару тёсонь, доскань мима. Пингсь ульсь шобда, пялеведа инголе. Моли сон эсь стака ускфонц мельге и арьси стака эряфонц колга. Пингсь кармась ма-латкшнемса гошевес. И синь пачкодсть Каргал велети. Мзярда кеподезе прянц, няйсь: цёранц ваксса моли шинельса аля, а сонць корхтай, што сон сай ичкозде, пяк сизесь, эняьдсь озафтомс усфть пряс. Алясь сонь озафтозе, а сонць кизефнесы.

— Тон кият и коста саят? Озаф шинельстось мярьгеь.

— Мон японскяй войнаса шавф солдатан. Тянь содазе семьязе и эрь кизоня тиендсть ти-ендема поминках Курок тага лемозон аноклайхть поминка. Тя шиня и тейне эряви повомс куду. Ичко-зеде саян, кенордан, а вов ни аф лама модема, но сизень. Пади, лемдема шити афи кенерян. Самс тейне эрявсь ялга, апак ваймак и лама ши. Кда аф верондат, сувак Каргал веле песта ве-теце кудти.

Пачкодсть Каргал велети, шинельстось валгеь усфть пряста и тусь велеть шири. А базару моли алясь пяк эводсь, шапканц алда щяярензовок стясть, пряц кзнезевсь. Пачкодсь Спасскяень ба-зару, тёсонзон-добранзон мизень, мрдась куду. Кодак пачкодсь Каргал велети арьсезевсь сянь колга, мезе лисендсь мархтонза. Верондай и аф: «Дайка суван азф кутти, проверяса». Сувась. Кудсь пяшксе авада-аляда, поминка ётафтыхть. Алясь кизефтезень:

— Простямасть, кинь поминандатада? Кудазорсь азозе:

— Цёразень лемдема шиц. Инксонза поминандатама. Цёразе шавовсь войнаса.

— Мон няине цёранттень и ускине сизефста ки лангса. Азондозе кода тя ульсь. Бабатне мярьгсть:

— Няить кулоф ломанть — учт аф пара. Аф лама пингта меле алясь кулось.

3. Алясь тусь вирень керома, сатовсь оцю шуфта алу, шавовсь. Кудонь ломаттне квалманза ку-вать пичедсть. И вов весть тяфта пичедихть-аварьдихть, ужяляйхть, кемгафтува частста веть панжевсь кудонь кенкшсь и сувась шавф и калмаф алясь. Авац кенярдсь мирденцты, ушедсь перьфканза шарома. Алясь мезевок аф корхтай, аньцек аванцты венепти кодама-бди ашкотфса карьхцяф соткскя — калаця мархта. Авась ярхцась калацяда, лядыксть путозе пря алонза и мадсть марса удома. Шобдава авась стясь — мирдец аш. Валхтозе прястонза соткскять — эсон-за траксонь ваце. Мирдсь кармась сашендома эрь веня. Авась ушедсь осалгодома. Ломаттне састь мяльс: авать мархта тиендеви аф цебярь тев, сон повсь палас. Фкя бабанясь теенза мярь-ги:

— Мзярда мирдце сай, азк, што ведрашкяцень тонадозе кяжи буканя и кизефтьк, кода сонь аценьфтемс.

Кода бабась тонафтозе, авась стане и тиезе. Кодак веть сась мирдец, сон ёфтазевсь.

— Ведрашкянязенди тонадсь пяк кяжи бканя, афи содаса, кода и ацентьфтемс. Мирдсь кежи сельмоса варжакстсь и корхтай:

— Сетрища шяйста эряви сатомс Чертогонь тише и кодак буканясь сай, плхтамс тишеть. Ка-чамть эзда букась эводи, туй, меки аф кармай сашендома. А тя сашенды алясь ульсь авати аф мирде, сонь шамаликсонза шайтанць.

Авась якась Сетрища шяйти, сатсь Чертогонь тише и мзярда шайтанць нинге сась, авась ти-шетнень крьвястезень. Эста шайтанць пшкадсь:

— Ну, курокста шарьхкодеть мезе тиема. Афолеть шарьхкоде тячиень веня сязенделихтень па-морькскакс.

3. Фкя бабась кельгозе пси баняса эшеляманц. Кие аф явафты баня, обязательна моли эшеля-ма. Весть фкя семья уштсь баня. Себе эшелясть. Матозь толхнень, сёлгозь банять и тусть. Ба-бась смеказе, што тоса кивок ни эшеляй аш, пялеве малати срхкась баняв. Моли тоза и ваны, баняса толне палы. Бабась кенярдсь, што псись баняса ашезь юма и што тоса кармай эшеляма аф ськамонза. Юксозе карконц, каязе щамонц, панжезе баняв кенкшть и мезе няи — тоса эше-ляйхть шайтаттне. Мзярда шобдава ломань ава сувась банянь урядама, няезе: бабась сялдазда пондаф поталакти, а кядец ваткаф лутошка лаца.

Тя случайда меле фкявок ломань изь яксе баняв ськамонза эшеляма и сембода пяк пельсть пя-ле вень малас.

4. Улендсь велесонк и тяфтама случай. Фкя авать семьястонза юмась стирня. Юмась и юмась, наверна, цыгаттне салазь. Ётась пинге. Стирнясь аш и аш. Мезе тият? Юмамацка юкставась. А ся пингонь шачф иттне кассть, пеетькшнесть радовондасть мамаснон, батяснон. Налхкондсть ульцяса, морсесть. А весть кончсса налхкозевсть шава кудса или баняса, кода эста эрьсесть Роштувань празднить эзда сявомок Крещенияти молемс, мзярда ушеса цятнась кельмось и тоса кувать аф кирдят — эендат. Ну пуромихть синь шава баняв и налхксихть. Ушедыхть налхк-сема эсь ётковаст, а меле няйсазь: ёткозесть кармась лисендема аф содаф стирь. Ёразь кундамс, но изь сафтов, изь удалакшнев. Тянь колга азондозь сире бабанди. Ся и корхтай:

— Тя стирть нинге ёмласта салазь шайтаттне и синь ётксост кассь-трявсь. Эряви кундамс, кргозонза щафтомс крёске. И вов иляденди од ломаттне тусть баняв налхксема. Ёткозост тага лиссь аф содаф стирсь. Налхкома ёткть фкя цёрась шарозе стирть, кундазе и мяштезонза щафтсь крёсткять. Стирть шамац васенда крьвязсь толке, меле акшемсь и сютямсь. Стирсь ульсь пяк мазы и ашезь лисе баняста. Лядсь вел ень од ломаттнень ёткс и азондозе, кода сонь шяйтаттне салазь и касфтозь.

Кона цёрась кундазе, ся и рьвяясь тя стирть лангс. Эрясть синь лац и кувать. Уноксна и прау-ноксна и тяниёк живойхть, тячимс эряйхть велесонк и синь кудсна вов тоса и тоса. А шайтат-тне аф аньцек салсихть шабат, но и ись шабаснон полафнесазь лия ломанень идь мархта. По-лафтф шабатне пяк сярятькшнихть и кувать аф эряйхть.

Рассказали в 1967 г. жительницы с. Мордовская Поляна У.К.Пинясова, 1878 г.р. (1);
Ф.И.Фёдорова, 1887 г.р. (2); А.А.Сабуровой, 1900 г.р. (3); Пинясовой 1886 г.р. (4).

Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений".

Мокшанский фольклор Зубово-Полянского района

На первую страницу

Hosted by uCoz