Колма братт

Мзярда модать лангса ломаньда аф ламоль, эрясть-ащесть колма братт и сокор мамасна. Кафта браттне ульсть тазат и ёжуфт, а колмоце братсь шава пря цёраня, лиякс мярьгомс — дураконя. Кафта браттне якасть работнема, лама тевонь тиема: нармонень и зверень шавондома, сёронь урядама, шуфтонь керома, жуватань ванома, а дураконясь ляткшнесь куду, ванць кудть эса. Тя-ряц куцьфоль вярдень утомс, кштирдсь пона.

Весть дураконясь сувась тейнза, тядянц кядьста анась ярхцамбяль: маряк, пекоц вачсь. Тяряц дураконять саманц ашезе няе, кштирдеманьбачк анаманц ашезе куле и дураконясь сонь токазе. Тядяц прась вярде алу мастору и шавовсь. Дураксь кеподезе тядянц, меки кеподезе вяри, озаф-тозе кудть инголи, кядезонза макесь кштирь.

Ушева якай кафта браттне састь работама вастстост и анасть ярхцама. А ярхцамс дураконясь изь пиде. Сон куцсь вярдень утомти, токазе тядянц и сон прась алу. Дураксь сась куду и азозе, што тядяснон шавозь. Шавозь, так шавозь. Тядять эряви анокламс и ильхтемс тона модати, ко-да эряви тиемс лемдема.

Браттне и корхтайхть:

— Дурак, тон тячи сувак седялу, кармат якафтома поза. Дураксь сувась седялу и мзярда братт-не мрдасть, кизефтезь:

— Дурак, тон косат?

— Мон тясан? — отвечась сон.

— Мезе тият тоса?

— Тядязень поминандамс кунцян калнят.

Браттне корхтайхть:

— Кда и тяса аш толкце, архт базару, рамак лемдемс куцюфт, шаванят, сяканят, с ал, вай, шрат и эзепт.

Дураксь кильдсь алашат. Тусь базару. Мезе мярькфоль, семботь рамазе. Озась повосканязонза, айгозе алашанц, ся тусь ардома, а шаванятне-месне кармасть комотнема, калдордома. Дураксь кяжиясь, лоткафтозе алашанц, куцсь шаванятнень-меснень лангс, лангсост комотнесь, сембонь тапазень. Тага тусь киганза. Ваны: эшиняста пиненя сими. Дураксь ювади:

— Пиненя, а пиненя, тят симе салфтома ведьта.

Дураксь мольсь эшити,пинесь эводсь, ласькозь тусь.

— А, виде, салфтома ведсь аф танцти, сяс и пинеське кадозе.

Сявозе повоскастонза салть и каязе эшиняти:

— Тяни ули танцти.

Тусь киванза. Ваны: кись лазонтф. Лоткафтозе алашанц, сявозе ваенц, кармась кить ваденде-монза, лоткнень паннема. Арды, арды и мезе няи? Пичетнень прясна ушедсть эйндама, ле-шавсть. Лоткафтозе алашанц, сявозень апак яжаф сяканятнень и путозень эйндаф пичетнень пряс: «Сяда аф эйндайхть!»

Сась куду, браттне корхтайхть:

— Мезе мярьгондеме рамать?

— Рамань, — мярьгсь дураксь.

— А косот рамафне?

Дураксь азондозе семботь, мезе тись куду самста. Браттне корхтайхть:

— Ах, дурак, дурак, тязовок аш толкце, архт поминкас ломатть кочкак.

Дураксь кильдсь алаша, тусь ломанень кочкама. Мольсь ломаттненди и мярьги:

— Молись-молеза, аф молись-лядоза. Тинь, бабанят, моледа, тинь, атанят, тяда яка. Тиньфте-монттка тошна.

Бабатнень ускозень куду. Браттне кизефнесазь:

— А мес атятне ашесть са?

Дураконясь тусь атятнень инкса. Мольсь и мярьги:

— Тинь, атянят, аряда, а тинь, шабанят, лядода. Тиньфтемонтка тошна. Молись — моли, аф молись — кудса ащи.

Тердезень, а моли аш. Сась куду, ускозень атятнень. Браттне толкавасазь:

— А мес шабатнень ашить уска?

Дураконясь тусь шабатнень ускома. Сявозень шабатнень, кудозонза пачфтезень, навась курго-зост пачат — вроде ляпиясть, а сон синь кулофтозень, сембонь опаптозень. Браттне корх-тайхть:

— Кода эздонза пря араламс? Эряви козовок ворьгодемс. Миньге калмасамазь.

Браттне кармасть ворьгодемати аноклама. Косьфтасть кафта кяскафт коське кшит, путсть сиволь и венькучкать арьсесть мянемс. А дураксь кулезе, мезе брадонза корхтасть и смеказе тянь тяфта. Дураксь стясь венькучкать, фкя кяскавста шамдозень коське кшитнень, вастозост эцесь сонць. Браттне фатязь кафцьке кяскафнень и кудста — ласькозь. Фкясь корхтай:

— Моннесь пяк стака, мес-бди цють кандови.

А омбоцесь корхтай:

— Тонь, наверна, ашесть коське кшитне. Нинге начкт.

Брадоц корхтай:

— Давай ванцаськ.

Панжезь стака кяскавть, дураксь комотсь стака кяскавть потмоста и корхтай:

— Монга тясан, колмоненк сяда пара.

Тусть колмонест. Мольсть, мольсть, дураксь мусь рузавань пря. Сяда тов тусть — мусь кулоф рузава и корхтай:

— Братт, мон тянь сявса. Брадонза корхтайхть:

— Тят токсе, тят сявонде, пякстафцамасть.

Тусть сяда тов. Мольсть, мольсть, сатозень шобдась. Эряви кати-коса удомс. Мусть пиче, пи-четь алоц такор, такор. Ваймясть, меле удома куцсть пиче пряти. Венькучканя пичеть алу састь оцю крандазса алят. Синь ульсть разбойникт, зепсост ульсь грабаф ярмак. Разбойникне васенда ярхцасть, симсть, тоса веляфтозь салаф ярмакснон, ушедсть лувома и явондома. Ду-раксь тошказевсь:

— Брат, а брат, монь пяк чурамазе сась. Аф кирдемшка.

Дураксь ушедсь чурама, а разбойникне корхтайхть:

— Боже мой, роса пяяри. Ванды ули лямбе ши.

Ащесь, ащесь дураксь и ашезь кирде, тошказевсь:

— Братт, а братт, монь пекозе сярястькстсь.

Дураксь шамдозе пеконц, а разбойникне корхтайхть:

— Галушкат пяярихть, менельсь вачеда аф кадсамазь.

Ащесь, ащесь дураксь, кяденза сизесть тарадонь кирдемат, нолдазе рузавать прянц и сон прась разбойникнень кучкас.

Разбойникне эводсть, а атаманць мярьгсь:

— Тяда эводе, тя Иван Крестительть пряц ковть лангета кеворсь.

Разбойникне озасть меки, ушедсть ярмакснон лувома. А дураконясь сяконь содай: «Братт, а братт, монь и омбоце кядезе сизесь». Кядец лафчемсь, нолдазе кулоф рузавать и сон прась раз-бойникнень лангс. Разбойникне эводсть, комотнесть, тусть ласькозь, кие коза муй васта.

Браттне валгеть пичеть пряста, кафттне еявозь ярмакнень, тусть козяста куду, а дураконясь лядсь дуракокс, лядсь вирь потмос, кармась тюрендема зверьхнень мархта.

Рассказал в 1967 г. житель с.Мордовская Поляна В.Е.Бибишев, 1893 г.р.
Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений".

Мокшанский фольклор Зубово-Полянского района

На первую страницу

Hosted by uCoz