Колдуттнень и ворожиятнень промозснон колга азкссне

Кужа велесонк кунара эрясть ломатть, конань эсь пряснон лувондозь и азонкшнезь колдункс. Ня ломаньфтома ашезь ёта фкявок свадьба, фкявок идень кстиндамась, фкявок ломанень и жуватань пчкафтомась. Ломаттне пелендсть эздост: аф тердьсак сонь — учт оцю осал. Свадь-баса или кстинаса синь озафнезь почётнай вастс, каванязь танцти ярхцамбяльда, казендезь це-бярь казнеса. Квалмаст азонкшнесть лама азкста. Вов эздост кой-конатне.

1. Фкя семьяса шачендсть аньцек стринят. Эстонь эряфса стирть лувондозь соркс, семьяти го-рянь кандыкс. Ся кунардонь пингста стирьхненди и аватненди модань пай ашезь макссев. Мо-дать макссезь аньцек алятненди. А тя кудса, конань колга моли корхтамась, шачендсть аньцек стирьхт и стирьхт. Вов авась тага пекиясь, учихть цёраня. Изь кенере сон шачфтома — кудбря-сост мезебди дуборгодсь. Кудсь кармась шеремома, поталаксь и стенатне ушедсть люкама, вя-ри-алу комотнема, пянакудсь кштизевсь и каладсь, кенкшне тусть кемоста калтыема. Кудть потмоса тя пингть ащесь сире бабаня, сон тертьфоль шачфтомань тефнень тиема-прдама. Сон и корхтай:

— Ваттака, Анна, вдь тя колдун сась пиже шабанять сивома, но теенза мезевок тя аф тиеви, сяс и бушавай.

Мзярда авась шачфтсь цёраня, ашкодозь нуланяса — дуборфсь и кудонь зернямась виензась ся-донга. Эста бабанясь мярьгсь кенкшть панжемда сяда келиста. Панжезь кенкшть куду, сувась равжа ката, ушедсть кунцемонза, кундазь. Кундазь катоть и максозь бабаняти. Сон сявозе ка-тоть и керозень ингольце пильгонзон. Кой-конатненди катось ужялель, ушедсть бабать эса сю-цеме, мезенди сон тиезе тя тевть. А бабанясь корхтай:

— Тяк ужяльде, Анна, тя катоть. Тя катось — колдун и сашендсь шачф цёраняцень сивома.

Ня валхнень азозень бабась и катоть ёрдазе ушу. Омбоце шиня шачфты авась мезенксабди мольсь соседонь пяли. Синь бабасна ащесь пянакуд лангса и пяк куфцесь.

— Меc, бабай, тяфта куфцят? — Пшкядсь саф авась, — или cярядят?

— Сярядян, моцезе маштсь, карязозевок аф кеподеви.

Бабать кяденза ашкотфтольхть нуланяса и сон старандась синь эцемс щамнянц алу. А бабанять ёмла уноконяц мярьги:

— Кие-бди керозень бабазень кафцьке кядензон.

Эста шачфты авась шарьхкодсь: ширезост исяк сувсесь колдун соседкась. Тяфта, кода азонд-сазь, бабась лядсь кядьфтома и лоткась ёмла иднянь сивондема.

2. Велесонк фкя колдунтти мярьгондсть Зиной атя. Ломаттне корхнесть: ламоксть няендсть равжа катот, пинет, айгорхт, конат пряснон вятнезь аф стане, кода теест ба эряволь. Азондозь, што Зинай атя тяфта полафнезе эсь шамаликонц и арсесь нльне нармонькс. Корхнемась тянь колга ломаттнень ёткса мольсь аф стак. Весть умань урядама ланга обедта меле, мзярда шись ульсь пяк пси и опана, сембе мадсть крандаз алу эшеняти ваймама. А фкя бабанясь, конань ся-возь идь мельге ванома, коданга аф матодови и няйсы, што Зинай атянь крнай кургстонза удом-бачк нармонь лийкстась, тусь менельге шарондома и юмась. Бабанясь стяфтозень удыхнень и азондозе мезе няйсь эсь сельмосонза. Кивок аф верондай. А фкясь корхтай:

— Да мезе стак лапатама. Кда Зинойть ваймоц нармонькс веляфтсь, теенза эряви шаба си-вомс, вий кочкамс, няк сиредсь, од вер теенза эряви. Кда тя афкукс стане, сон тяни аф маряй мезевок, давайте шарфтсаськ шаманц мода шири. Шарфтозь Зинойть пеконц лангс и учихть ме-зе ули. И ваныхть, лийкстась нармонь, кармась тов сей лиендема. Лиендсь, лиендсь, а васто-зонза коданга аф пови, меки аф сувави и ушедсь морама стане жалобнайста, што киньге седиец тянь кулеме изь кирде. И Зинойть шарфтозь меки кода сон инголе удось — копоренц лангс. Аньцек тянь тиезь, нармонць эсток юпадсь крандазть алу и юмась. Эста кармасть содама, што сон, Зиной атя, аф стама кодапт сембе, а колдун, якай вдень сивондема, веронь симома.

Фкя пингста вирь потмоса вирень ваныть авац шачфтсь. Тянь марязе Зиной атя. Веляфтсь равжа кранчекс, лийкстась ся вирень ваныть шири. Лийкстась, озась сери пичеть пряс, учи, мзярда ёмла вднять кадсазь ськамонза потяфтомада меле. Ащи пичеть пряса, каркнай и ванон-ды. Каркнаманц кулезе вирень ванысь и арьси: «Тя аф стак. Прахсь еяволезе афпарморть». Сявсь ружья, лиесь кудста и няи равжа кренч. «Инголи тяфтама каркиема вестевок ашель, а тяни вов идезе шачсь и пешкоткшни ёфеи кудть маласа. Тя аф паронди», — арьсесь вирень ва-нысь. А кренчсь стаки каркияй, стаки каркияй. Вирень ванысь люпштазе курокти суронц, анок-лась ляцема, но кранчсь юмась, а пичеть ваксе эвондась Зиной атя. Вирень ванысь корхтай:

— Тя тон, Зиной атя?

— Мон!

— Тон аф Зиноят, а варакат и ляцте. Месть тон тияне вень потмова шляндат. Тон аф ломанят, а колдунат, идень порият. Аф фкя идезе кулось ни эздот. Аньцек шачи и кулы. Тя тонне тевсь. — И ладязе ружьянц атять мяштьс.

Зиной прась плманжа лангс и кармась эняльдема:

— Тяк юмафта ваймонязень. Ёрдаса шабань сивондемать, а тейть аф весть кондястян стака тевса, лездан эрь вастса.

— Кда нинге поват инголен, шиса аф кадте.

Меле вирень ваны алять авац аф фкя тётьмак шачфтсь, но Зиной изь яка сивомост и сембе ид-нятне ульсть мазыхть и тазат.

3. Кужа велесонк ульсь и тяфтама колдун баба. Сон ашезь макссе покой од ломаттненди. Ащихть ульцяса стирьхне и цёратне и ёткозост кармась тихтетькшнема тува. Сувай од ломат-тнень круге и давай синь сускомс, мельгаст панцемс. Хороводсь калады. Цёратне еявихть бай-дект и мельганза. Но тувось мяни, кодавок аф токави и кодавок аф паневи фкя ужес, коса сонь вачкоделезь и кундалезь. Мяни. Омбоце илядня стирьхнень и цёратнень ёткс сай мазы стирь, а кие сон — кивок аф содасы. Кштий, морай сембонь мархта, и апак няйхть юмай. А меле, прахсь сонь еяволезе, од ломанень хороводе тихтеди буканя или вашеня. Арни стрьхнень цёратнень ёткова, цяфай, кштизь якай. Меле комоти лангозост и вачкияй, сусконды эсост.

Тяфтама тихтедематнень стирьхне и цёратне азондозь фкя воражиянди, конань цебярь тевон-за кулендевсть сембе перьфпялень велетнень келес. Воражиндай ломанць мярьгеь:

— Кодавок кундасть тя тихтедить. Кундасть и нарасть. Эсонтт эйфни колдун. Колмоце веня ломаттне тага пуромсть хороводса шарома. Ёткозост эвондась равжа уча.

Стрьхне и цёратне кармасть кундамонза. Ламос ласькондсть мельганза, коданга аф пови, аф кундави. Сембе сяка кундазь, понанц наразь, пилензон керозь.

Мзяра-бди пингта меле бабать кучезь баняв. Тяда инголе сон тоза яксесь унок стирнянц марх-та. Бабась кельгозе тя идьморть и куломда меле ёразень содамошинзон кадомс теенза. Тяни ба-бась ерхкась баняв ськамонза. А уноконяц эздонза аф кадови. Уноконяц ськамонза эшелямс пе-ли. Таки савсь молемс кафоннест. Мзярда бабась кайсезень панарнзон, уноконясь ваны: бабанц пряц нараф и сон пилефтома. Уноконяц кармась содама, што бабац колдунья и сон эвфни стирьхнень и цёратнень эса. А бабась нарамдонза и пилень керомдонза меле ломаттнень ёткс лисендсь прянь вельхтяфета. Тяфта кяшендезе нараф прянц и керф пилензон.

4. Велеса ульсь фкя аля. Весть сон тялясь розь. Озасть ваймама, а тя алясь мадсь копонц лангс и курокста матодовсь, ушедсь крнама. Вайместь-тисть, ушедсть тяляма. А тя алясь сембе удось панжада куркт и крнась. Брадорьвяц кармась стяфнемонза, но сон сембе сяка удось. Кармасть вачкиема бока ланга тялямаса, кучкорема пильгеа, но сонь думоцка ашель, сембе сяка

Мзяра пинге ётась, лийкстась варси, и давай алять вельхксса лиендема, вачкияма модати равжа пацясонза. Ламос лиендсь варсись, а ломаттне ваныхть: тя мезе тяфтамсь, мес тяфта лиенди варсись? Алясь ве уды. Эста сонь шарфтозь копонц лангс и нармонць лийкстась курго-зонза, сон сргозсь.

— Ков тяфта якать?

— Жарав вели якань, тоса шачфтсь ава и мон маряйне танцти сиволень пуштома таньфкять.

— Якать идень сивома?

— Да, лийкснень Жараву шабань сивома.

Ломаттне тя алять кундазь, ветезь попти. Попсь морафтсь озондомань малитва и алять одукс кстендазе. Лемдемда меле алясь полафтовсь, идень сивондемда, кальдяв тевонь тиендемда ёфси лоткась.

5. Фкя колдун авась колсесь од ломаттнень рьвяямда инголе и рьвяямать ёткса. Кульсы коса тиеви свадьба, анок приметасы ся кудть, сувай и ушеды колсема, штоба и невестась и женихсь кувать марса афольхть эряв и кулсельхть.

Весть Кужеса срхкафтовсь свадьба. Стирть максозь колдун авать племянниконцты. Вов кол-дун бабась сась свадьбати, кармась мезе-бди мтрдома. А лиси рьваксс стирть ульсь бабац, кона маштсь кальдяв тиенди колдунтть перяма, полаксама, поперечендама. И мзярда састь стирть сявома, сон морафтозе поперечендомань молитвать тяфтама валса:

Исеки-месеки,
Каменные пятки,
Золочёные сопожки.
Шиса шарф,
Ковса перяф.
Покров Богородица,
Покров Господине,
Кшнинь котёл алу комафтф,
Кшнинь замокса пондаф,
Христозонь ризаса вельхтяф.
Спаси, Господи,
Помилуй злодейда,
Лиходейда — колдунда.
Всякай напрасливай смерттьа.
Аминь! Аминь! Аминь!

Мзярда лиси рьваксс стирти тянь колмоксть морафтозе и колмоксть пецек сельгсь, колдун авась аварьгодсь и мельгак меки потазь, лиссь кудста. Аварьгодсь сон и кадозе свадьбать сян-кса, мес ашезь сата виец коламс женихть и невестать.

6. Фкя авать лама киза ашель цёрац. Мзяра изь шачфта идь, сембе стирьхть. Но вов шачсь ку-вать учсеф цёранясна. Вете кизос кассь парста-шумбраста. А кота кизонц лангс цёранясь ур-маськодсь. Ломаттне кармать корхтама и састь мяльс: «Шумбрашинц сявозе колдунць — Тю-нейре бабась». И мярьгсть кандомс тя бабать эзда вер, эста, мле, цёранясь пчкяй.

Курокста Тюнейря баба тусь сокань рамама. Цёрокшкять батяц кундазе сонь и ушедсь шавома. Снярс шавозе, мзярс эздонза ашесть ту шудема вер путькскат. Сась алясь куду, маладсь цёранцты и корхтай:

— Тяни, ажаней, аф кулат, курок пчкат, стяят, кармат ласькондема.

А цёранясь сембе сяка ашезь стяв васта лангета и изь пчкя. Ётась аф лама пинге и кулось.

Рассказали в 1967 г. жительницы с. Мордовская Поляна А.К.Ермолаева, 1887 г.р. (1);
А.Ляшина, 1889 г.р. (2); Е.С.Криворотова, 1886 г.р. (3); Е.Т.Криворотова, 1900 г.р. (4,5,6).

Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений".

Мокшанский фольклор Зубово-Полянского района

На первую страницу

Hosted by uCoz