Кафта братт

Эрясть-ащесть кафта братт. Кудсна синь ульсь фкя. Васень братть ульсь лама иденза, а омбо-цеть фкявок ашель. Кармась идьфтома братсь мрнама, а, «дескать, сонь иденза тейне аф ан-невихть!». Аф ламос эрямда меле, синь явсть — кармасть эряма башка. Идьфтомсь аф лама пингта меле козякодсь, пирьфоц пяшксель жуватада, паксянза шиста шис афольхть ётав. Бед-най братсь кармась покама ширесонза. Тяляй розьнят и карь потмозонза марай аф ламнянь. Сай куду — юкссесыне карьнянзон, и иднянза розьнятнень сараскакс кочкасазь. Фкя шиня козя братсь корхтай: «Кода, брат, иднятнень тряят?»

— Рознят повихть карьпрязон, сятнень мархта и аннесайне, — корхтай беднай братсь.

Омбоце шиня козясь кармась карензон каяфнема, штоба афоль иляда фкявок розня. Куду беднай братсь тусь — иднянза учихть, но розьнят тячи ашельхть. Работась, работась аф ламняс, но иднянза сякокс вачедотольхть. Фкя шиня и корхтай аванцты:

— Молян, туян, коза няихть сельмоне.

Тяка илядне сон тусь. Семьяц кудса аварди, а сон торай:

— Туян!

И, виде, тусь. Моли киге, мыслятне прясонза шарыхть, но ёфси аф шарьхкодьсы, коза моли. Пачкодсь ляйнять трвас, ляй берякть кувалмос касыхть эчке шуфтт и аф лама пинкта меле тусь мелкай пиземня.

— Месендема? Коза кяшема? — думандай беднай братсь.

Ваны, берякть крайса сотнеф венчкя. Мольсь малазонза, шарфтозе потмаксонц вяри, сувась потмозонза и ащи, а удомац аф сай. Пялевешкада маряй вайгяльхть венчкять маласа:

— Тон тячи месть тиеть, ялгай?

Тят корхтасть чёрттне. Синь главнайть инголе отчитывались.

— Мон тячи вов мезе тиень. Фкя алять цёранзон эрь шиня тюрьфтьсайне. Шить работайхть, а илять сайхть, как вачкодихть. Родительснонды коданга аф басявихть. А можнатольхть, — тага ушедсь корхтайсь, — пяк проста мирендамс.

— А кодане? — кизефнихть илядыхне.

— Вов кодане. Тяемс меки кядть масторть (кияксть), сорхнень ляцемс ульцяв стане жа, и сем-бе. Вестеньге аф кармайхть сялондома.

А беднай братсь сембонь тянь марясы, а сонць трнаты, кода ба афолезь му венчть потмоста. Омбоцесь корхтай:

— Тяса ули фкя мельник. Вов кода ковшка мучендай. Прудясазь ведть, частшка ащи прудсь — тага сязеви. Аф яжави 10 путт сера. А ся можналь прудямс вага тяфта: вирьса касы эчке пиче, сонь прясонза крест. Вов тя пичеть, путомс тоза, вечнай ули прудсь.

Тяни колмоцесь ушедсь:

— А мон вов мезе тиень. Оцязорсь правондаманкса прважазе стиренц церькаву. Попсь тяса макссь просверня, а мон «содействовал», штоба праль кядьстонза. Мзярда шлёпадсь просвер-нясь мастору, ватракшсь фатязе и сивозе, и тяниенге тозк. Эряви ватракшссь таргамс тоста. Лазомс пеконц, таргамс тоста — и сембе.

Шобдава лиссь беднай братсь венчть потмоста и ласькозь куду. Омбоце шиня тусь ся хозяинть шири, конань цёранза шавондыхть фкя-фкянь. Пачкодсь кудть малас:

— Нолдамак, добрай ломань, удома! — пшкядсь беднайсь.

— Коза нолдате? Шафтядязь монь цёраня. Эря шиня сяка тевсна — илять тюрихть и тюрихть, — корхтай хозяинць.

— Нолдамак, оду аф кармайхть тюрема.

— Ой, добрай ломань, кодама шкай тонь кандонзе? — корхтай хозяинць.

Сувась куду, а цёранза нинге паксясотольхть. Сявозе тяльмоть, тяезе кияксть, а сорхнень ляце-зень стама начка вастс, штоба куроконе наксадольхть. Цёратне састь, мезевок аф корхтайхть. Фкясь эздост корхтай:

— Аляй сяфть литра вина, мяленьке мирендамс.

— Кафта сяван, — корхтай хозяинць.

Атясь кандсь четверть вина, симсть — ярхцасть и мадсть мирнайста. Омбоце шиня стясть — ётковаст ведь аф пяяри. Хозяинць стане кенярдсь, мянь ушедсь беднайть палсемонза. Сяка ши-ня хозяинць марась усф почф, макссь 100 цалковай ярмак и ускозе ниге эсь алашанц мархта.

— Тевсь тусь, — думандай беднай братсь.

Омбоце шиня, куду самда меле, тусь мельникти. Ваны народсь уски кефт, шуфтт, наркитькст. Марайть и марайть, а ведсь сякокс синь уйфтьсыне веднять коряс. Беднайсь шаштсь и корх-тай:

— Хозяин, аф мярьгат ли тейне трудямс?

— Месть тапат, тяса аф тонь лацот ульсть, — корхтай мельниксь.

— А всё-таки, мярьк варжамс.

Омбоце шиня кильфтсь кафтошка алаша. Мольсть вири, керозь пичеть и ускозь. Сяка илядть нолдазь ляйти, кармасть прудямонза. Ведсь лоткась и стане прудявсь, што сяда меле мельниксь вестенге афи думандась. И, виде, плотинась, мярьгат бта, кшниннель. Мельниксь сяшкава ке-нярдсь, што эстокиге прважась ниле усфт почф, ярмак мархтонза макссь и ускозе куду. Беднай братсь кармась козякодома. Ярмакнень лангс рамась алаша, тракскя и эсь идензон лангс щапт. Ётась аф лама пинге, беднай братсь тусь оцязорть ширес.

— Тинь стиренте, виде, сярятькшни. Тинь врачт, кулине, вешенттяда, — пшкядсь беднайсь.

— Да, да, — отвечась оцязорсь.

— Ну-ка, няфтесте, стирентень.

Оцязорсь сувафтозе, а сонць афи верондай, сяс мес лама ни ульсь врачта, а киндиге ашезь пчкафтов. Алясь мольсь церькаву, таргазе ватракшть седялда, лазозе пеконц, таргазе прос-вернять. Мзярда сась куду, мярьгсь сивомда стирти. Стирсь сивозе. Ётась кафта-колма ши, стирсь кармась якама, а недяляда меле совсем пчкясь. Оцязорсь сняра парши макссь аляти, што еле усковсь. Беднай братсь стане козякодсь, што эсь брадонц кафксть ётазе козяшить шир-де. Фкя шиня сась козя братсь и корхтай:

— Брат, коста тонь тняра козяшить сявить?

Брадоц азондозе, кода сембе тя тевсь лиссь. Стане мялецоль соньге козякодомс, што еле-еле ащевсь час брадонц ширеса. Ся венекиге тусь сяка жа ляйнять крайс и сувась венчть алу. Сась весь. Пуромсть сембе чёрттне сяка васту и корхтайхть:

— Ну, брат, мезе тон тячи тиеть? — кизефни самай сиресь.

— Кядневок пряма прасть, ялгат. Мезевок аф тиеван.

Омбоцеське тяфта корхтай. Ушедсь колмоцеське, што прудтьке прудязь.

— А, может, минь кивок кулхцонкшнесамазь? — ювадсь самай старшайсна.

Кеподезь венчть, таргазь тоста козя братть.

— А, вона, кие, меки тяста аф мянят, — ювадсть сембе фкя вайгяльса. Фатязь, сязендезь пак-шень — пакш и ляцезь ведти. Тяфта «козякодсь» сядонга пяк омбоце братсь.

Рассказал в 1960 г. житель с. Старое Бадиково А.Г.Сурдин,1886 г.р.
Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений"

Мокшанский фольклор Зубово-Полянского района

На первую страницу

Hosted by uCoz