Жаднай помещик

Эрясть-ащесть атят-бабат. Ашельхть синь лама киза идьсна. И вов шачсь синь стирнясна. Тя кенярьксти ашель пе. А эрясть синь пяк кальдявста, хотя работакшнесть Сазонкин помещикть лангс шинек-венек, но ярхцамс кшисна ашель. Кассь акша келуня, няка стирня. Састь мельган-за кудат, а атять и бабать кудатнень инголи аш мезе путомс, кши сускомнясновок аш. Вов тусть атять мархта бабась Сазонов помещикть пяли милостень анама. Васьфтезень синь Сазон поме-щиксь кяжиста. Прасть атять мархта бабась плманжа лангс и корхтайхть:

— Батюшкай, улеза милосттце, дай тейнек фкя мешок розь, а монь семьязе тисы сянь, мезе мярьгат.

Срмазе конянц Сазон помещиксь и аф ламос ащемда меле пшкядсь:

— Мон максан тейнть мешок розь, а тянкса стирценди максан тяфтама задания: Очижинь веня кемгафтува частса веть велень каяма шяйть эзда лисенди церькавонь крестсь, песонза палы сведя, катк тя свецять сатсы и кандсы тейне.

Авардезь мольсть атять мархта бабась куду. Азондозь стирьснонды тя задачать, стирнясь и корхтай:

— Тят пичеде, батяй, тят пичеде, мамай, мон тиса тя задачать.

Вов сась ся весь, мзярда стирти эрявсь срхкамс свецять инкса. Ильхтезь стирть маманза — ба-тянза кис. Пачкодсь сон велень ваяма шяйть берякс, озась венчс и тусь уема шяйть кучкас. Уйсь, уйсь, вдруг мезебди тапарявсь венчезонза, варжазе — венченц перьф ашкоряф пархциень сюре кесак. Уски и уски стирсь кесакть ведть эзга, а кесакть пецка аш. Эзткак шуморсь кесакть пец и лиссь ведть лангс акша сакал атяня и пшкядсь:

 — Тяни сяфте мархтон!

Чопафтсь атясь стирть мархта ведти и кесакть вельде валгсть потмаксти. Стирть инголе тиф-тодсь церькав мархта оцю вальмя. Сувафтозе атясь стирть пялонза. Симдезе-андозе и корхтай:

— Тон срхкать Сазон помещикти,арьсеть валхтомс церькавозень пряста свецять, а тянь мархта тон юмафтолить сембе народть, вов тянь инкса тон кандат оцю служба, кармат целай киза ра-ботама монь пялон, пидема-панема работниконень пеке.

Стирсь аварьгодсь и корхтай:

— Ульхть цебярь атякс, нолдамак куду, мамазе и батязе вачеда и пичефкес кулыхть.

Атясь корхтай:

— Работама кармат цебярьста — срокта инголе нолдате куду и максан мархтот козяши, аф це-бярьста кармат работама — юмафтте, кода сяськонять.

Тиемс аш мезе, кармась стирсь честнайста служендама атяти. А бабась атять мархта маштсть вийда горять и вачть эзда. Синь эрь веня лисенкшнесть ся шяйти и ольксезь тернесть эсь стир-няснон эса. А сон аш и аш. Вов шумордавсь стирть службац, ерхкась сон куду. Атясь цебярьста работанкса макесь мархтонза лама золота. Лихтезе атясь стирть шяйста и мярьгсь:

— Кда саттядязь оцю нужаши, сак тя ваетти, тозердак тя парьхци кесакть, и мон улян тейсот. Но тянь колга содак аньцек тон.

Стирнясь тусь вели, сувась куду. Кодак мамац няезе, сяка пингть прась ежефтома, а батяц ку-нара ни пульзясь нужашить эзда. Сась ёжец бабать, правондась атясь и кармасть шиста-шиско-зякодома. Ламос прянц тапазе Сазонов помещикське, мезьста козякодсь нищай Архип атя и срхкась сонга весть молема шяйть тейс, штоба нинге сяда козякодомс. Вов тусь сон и меки са-мац ашель. Вешендсть — вешендсть эсонза, и музь шяйть берякстонза аньцек пакарензон. Сазонов помещикть куломдонза меле народсь кармась эряма цебярьста

Рассказал в 1967 г. житель с.Мордовская Поляна В.И.Бабишев, 1893 г.р.,
он был кучером у помещика Сазонкина, о котором идёт речь.
Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений"

Мокшанский фольклор Зубово-Полянского района

На первую страницу

Hosted by uCoz