Иван Царевич

Оцязорть стирец пекиясь, васькафтовсь. Тянкса оцязорсь панезе кудста и вятезе прянц керома. Судендазь лият — корхтасть:

— Кафта ваймот юмафтат, кда прянц керсак, лучши паньк царствастонк, ков няихть сель-монза.

Сон и панезе царствастонза, ков няихть сельмонза. Моли стирсь, да аварди, Шкайти эняльди:

— Тряй атя, кормилец, макет тейне кул ома, пяк грешнаян!

Мольсь сон моря берякти. Аш коза ётамс тейнза. Сайхть купецонь цёрат, эняльдсь тейст:

— Панесть корабльть и еявомасть моньге и ётафтомасть омба бокс.

Синь панезь карабльть и озафтозь. Кувать мархтост ускозь. Сон ков эряй, пексь сембе касы. Купецонь цёрась мярьгеь: Тонь мархтот пеке каесь. А омбоцесь мярьгеь:

— Тонь мархтот! Кали, тон аф грешнаят мархтонза, — монга-аф, давай валхтсаськ. А то, — мярьгеь, — мольхтяма куду алянеськ мярьги: «Якафттада мархтонт стирь!».

И валхтозь сонь.

— Архтт, — мярьгеть, — ков кельк!

Сон тусь, ков няихть сльмонза. Моли вирть пачк, Шкайти эняльди:

— Кучт тейне хоть зверь, монь сиволемань ба.

Ваны — офта уторозонза сай.

Эрь ни, тяни, — мярьгеь, — сивеймань.

Кодак сась уторозонза, офтсь тейнза сюконясь. Стирсь ётась и офтське тусь. Стирсь корхтай:

— Ох, Господи! Монь зверьхневок аф сивсамазь! Пяк грешнаян!

Сяда тов моли, и тага эняльди Шкайти, штоба сиволезе зверь. Ваны — сай уторозонза Лев. Ко-дак састь уторцек, тага сюконясь тейнза. Стирсь тусь, и лефське тусь. Мольсь, мольсь стирсь вирть эзга, мусь такор ян. Тусь сонь эзганза. Лиссь полянас. Полянать эса гож куц. Сувась стирсь кудти, ваны: вальмять лангса веры щапт и панархт. Сон сявозень и муськозень, кось-фтазень и марс ашкодозень, меки вальмять лангс путозень. Сонць кяшсь трубать фталу.

Илядень пялети сась Иван Царевич — богатырсь лишмонц лангса. Лев зверь мархтонза. Су-вась сон кудти, ваны: щапне — панархне муськфт и косьтафт. И корхтай эстейнза Иван Ца-ревич:

— Кие монь щамнень муськозень? Кда мондедон сире — улеза родной аказе, а кда мондедон од — улеза родной сестразе.

Лиссь стирсь. Кармасть синь корхтама, кода альнякат — сестрат. Иван Царевич кенярдсь, ули тяни кудонь ушниец. Ащесь аф ламос стирть мархта и тусь тага охотас. Максозень тейнза панжематнень.

— И сипть, и ярхцак, мезе тейть эряви, а мон аф саван тяни недяляшка.

Сась сон недяляда меле.

— Мон, — мярьгсь, — сестрай, тяни аф саван кафтошка недяля.

Тумдонза меле стирсь шачфтсь. А попт тоса аяш, путозе сонць идть лемонц Фигор Царевич. Кафта недяляда меле сась Иван Царевич. Кенярдсь:

— Тейне Шкайсь макссь племянниконя.

Эрясь-ащесь, тага срхкась тума:

— Тяни аф саван, сестрай, ковшка.

Цёраняти, мзярда кудса ащесь, тийсь текорня. Цёранясь тусь вири — мамац изь стрядон-да. Мольсь, мольсь, шавсь Лев лефкс. Кандозе куду.

— Вов, мамакай, мезе шавонь!

— А, дурачок, а кда мамац сиволензе?

Сась Иван Царевич ковда меле. Пяк ранендафоль.

— Тяни, сестрай, — мярьгсь, — мондейне кулома.

Эрясь аф ламос и кулось.

Лишмоти куломстонза корхтай:

— Кода мондейне служендать, — стане и цёранять ала служендак. Лев! И тонга — кода мон-дейне служендать, стане и цёраняти служендак.

Цёраняти корхтай:

— Куване мон яксекшнень, тон сияне тят яка.

Эрясь аф ламос, и кулось. Эряйхть-ащихть мамат-цёрат. Сон кассь ни оцюшка.

— Мамай, — мярьгсь сон, — молян тов, ков оцязе яксекшнесь.

— Няить, идякай, оцяце торась — тят ноля монь киган.

— Аф, мамакай, мон аф ичкози молян, бславамак.

— Архт, бог богославит, кда аф кирдеват. Сон кильдезе лишмонц, сявозе Лефть мархтонза и тусь охотас. Мольсь моря трвас, лиссь каршезонза колма пряса куйсь и корхтай:

— Ох, Фигор Царевич, оцяцень аф тонь лацот ульсь виец, и то тусь кядьалганок, а тон, — мярьгсь, — нинге одат.

— Анокс тят фаленда, поганай тварь!

Кодак яфодсь байдекса, сязезень колмоцьке прятнень, кеподсь кев и вачказень алонза, теланц — ведти. Сась куду, урядазе лишмонц, а Лефоц сувась куду. Цёрась — мельганза.

— Ох, мамакай, сянкса торсесь оцязе: «Тят яка монь киган!»

— То-та, мон, цёрай, корхтань — «Тят яка!»

— Да мон, тядяй аньцек весть яфодень и сязине сонь прянзон. Недяля ётась, тага кизефтезе маманц.

— Бслави, мамакай, тага туян охотас.

— Архт, мярьгсь, — Шкайсь благославиндатанза.

Седлазе лишмонц и тусь, Лефсь мархтонза. Ётазе ся морять, пачкодсь оцю эрьхке берякс. Лиссь куй сисем пряса. Фалендай куйсь Фигар Царевиченди:

— Эх, — мярьгсь, — оцяцень аф тонь лацотоль виец, и то тусь кядьалганок, а тонь эздот мон обедан.

— Паганай тварь, тят хваленда анокс! Кода Шкайсь мярьги.

Кармасть тюрема. Кафксть яфодезь керозень сисемцьке прятнень, вачказень марс, каннесь лангозост кархчт и крьвястезень, палсть прятне, а телать эрьхти ёрдазе. Меки мрдась куду и корхтай:

— Эх, мамакай, сисем пряса куй лисендсь уторозон.

— То-та, цёрай, изень мярьгонде оцяцень киге якамда.

— Мон, — мярьгсь, — кафксть яфодезь прянзон сязине. Недяляда меле тага маманц кизеф-несы:

— Бслави, мамакай, тага охотас.

— Архт, — марьгсь, — Шкайсь бславатанза, кда аф кирдеват тейне. Сон седлазе лишмонц и тусь лефонц мархта. Ётазень сембе странатнень, сембе эрьхкнень и сась моря. Срхкась война, лиссь кемгафтува пряса куй. Кармась хвалендама куйсь:

— Аф тоньшкасот, — мярьгсь, — виец ульсь Иван Царевичень, и то тусь монь кядьалган, а тонь эздот аньцек кемгафксувксть сускан.

— Тят хваленда, поганай тварь, кода удалай!

Кармасть тюрема. Колмоксть яфодезь цёрась керозень куйть вейхкса прянзон. Лефть мархта керозе остатка прянц, прянзон кев алу вачказень. Фкя прясь кода-бди кеворсь моряти и тиевсь цёракс, мольсь Фигар Царевичень маманцты сонь самозонза. Мзярда няезь, што Фигар Царе-вич сай, корхтай маманцты:

— Вана, — мярьгсь, — цёраце сай, тяни коза кяшсамак?

Сон кяшезе аксялу. Сувась Фигар Царевич, лефське сувась. Кармась сеттнеь эса няфнема. Лиссь Фигар Царевичень мамац ушу.

— Фигар Царевич, мес, — мярьгсь, — дураскодсь Лефце? Бона, най эсонк эвфни, пори сеттнень эса.

Сувась Фигар Царевич:

— Леф, — мярьгсь, — панде, лоткак.

Лефсь мадсь боком. Фигар Царевич изь яка ичкози охотас, маланява якай ши лангс. Тона цё-рась торай:

— Кода цёраце юмафтомаль?

Кода юмафтсак сонь, — мярьгсь, — вийнза пяк лама.

Мамац корхтай:

— Тон, мярьк, цёрай, тук канат. Сотсайне кяттнень, варжаса вийцень.

— Эль, — мярьгсь, — мамай, сотыть.

Ся тварьсь тонафтсы маманц:

— Тик пряцень сярядикс. Кда сатолеть тейне вирень тувонь сиволь, пади, правондалень. А ти-тя, — мярьгсь тварьсь, — кда моли вирень тувонь сиволень инкса, сязендьсазь тозк тувотне.

Сась охотаста Фигор Царевич.

— Мес, мамакай, тон тяфта охият?

— Ох, цёрай, аш моцезе вовси. Кда сафтолеть вирь тувонь сиволь, пади, правондалень.

— Пади, шкайть милостьса сатан.

Щась шобдава и тусь. Моли киге. Тоса Премудрай Василиса, сонь щакац. Кодак ардсь лефсь во-ротатнень лангс, воротатне кшнинь и панжихть эсезост. Лиссь Василиса уторозонза васьфте-монза.

— Коста тонь Шкайсь канттанза, племянниконяй?

Сувафтозе горницяти, симдезе-андозе, кармась кизефнемонза.

— Ков молят?

— Щакай, мамазе хвори, кучемань вирь тувонь сиволень сатома.

Василиса Премудрай мярьгсь:

— Племянниконяй, трудна сатомс.

— Кода ина, щакай?

— Архт, максан ашкоряфкскя. Молят, сатат ниле кит крест накрест. Ёрдак ашкоряфкскять ся китнень кучкас. Лоткай ашкоряфкскясь кона вастти — шуфт тоза лотка. Тяза няев лефцевок, лишмоцевок, тонцьке тят няев. Сайхть тувотне и мадондыхть болотава. Фкясь ляды карауль-щикокс. Озак лишмоцень кучкава меченек, хватяк котянь ширет и ворьготть, лоткти кяшть, мзярда лоткайхть пешкодомда, эста коза мяльце — тоза архт.

Сон тусь. Тувотне кода састь болотать эзга, стане тоза и мадсть. Сон лиссь лишмонц лангета и цяподсь фкя борав и ворьгодсь лоткти, кяшсь. Тувотне прасть, кармась ювадема, пуромсть сем-бе тувотне и давай вешендема сонь. Кулось прясь, лоткась пешкодомда, тувотне срадсть васто-васт. Фигар Царевич тусь Василиса Премудраень пяли. Мольсь ворота лангозонза, воротанза панжевсть, сувась ширезонза и шумбракстсь:

— Шумбраста ли мрдать?

— Слава Богу, щакай.

— Сатоть ли сиволь?

— Сатонь, слава Богу!

— Тянь эзда мамазе правондай.Сон макссь тяфтама кудонь тувоста сиволь.

— Архт, племянниконяй, макск, правондай.

Сон тусь маманц шири. Ся молодецсь няезе:

— Вона, сай тонь цёраце.

Молодецсь кяшсь аксялу. Кодак мольсь, лефсь сувась куду, давай сеттнень эса синнемс. Лиссь Фигар Царевичень уторозонза мамац:

— Мес, цёрай, аф кардасак, лефцень, сон дураскодсь, синни сеттнень эса. Сувась Фигар Царе-вич:

— Леф, пандя, матт!

Максозе сивольть маманцты.

— Ой, спасиба, цёрай!

Омбоце шиня тусь Фигар охотас ши лангс. Молодецсь корхтай:

— Тик еярядикс пряцень, мярьк: « Цёрай, сатолеть кулы ведь и эрек, эста правондалень». Сон туй, а меки аф сави, кулы. Эрек веттне ащихть кафта панда ёткса, кодак моли, эци тоза — сонь люпштасазь.

Сась охотаста Фигар Царевичсь:

— Мее, мамакай, тага охият?

— Эх, цёрай, аш лучши. Кда сатолеть кулы ведь и эрек, эста, пади, правондалень.

— Пади, Шкайть милостьса и сатан.

Стясь шобдава Фигар Царевич, тусь охотас лефонц мархта. Мольсь Премудрай Василисать пя-ли. Кодак ардсь лефсь воротатнень лангс, синь панжевсть. Сувась Премудрай Василисать пяли.

— Здарова, щакай!

— Здарова, племянниконяй. Ков тонь Шкайсь канттанза?

— Щакай, мамазе изь правонда.

— Тяни мезенкса кучензеть?

— Кула и эрек веденкса.

— Племянник, стака сатомс кула и эрек ведь.

— Мее, щакай?

— Синь кафта панда ёткса ащихть, фалу шавихть марс. Кодак суват, люпштатядязь.

— Кодане, щакай?

— Архт тов, максан вяшкоманя. Молят кодак, кармат сувама — вяшк и лисят. Тага вяшк, синь лоткайхть шавома.

Прощандась да тусь. Пачкодсь кафта панттнень ваксе, кармась вяшкоманяса морама. Лот-касть панттне шавома марс. Амолдась кула и эрек ведь. Кодак лиссь, лоткась морамда, вар-жакстсь фталу. Лефть пялец лиссь, а омбоце пяленц сатозе пандсь и кучкава керозе. Кармась Фигар Царевич авардема инксонза. Тусь, сась щаканц пяли. Воротаттне аф панжевихть, кармась юватькшнема. Щакац ашезе куле. Ушедсь авардема. Воротать лангса щакац и корхтай эстейнза: «Эрявль ни самс тейнза!». Лиссь сон калдазу марязе авардеманц, панжезень воротат-нень.

— Мес Фигар Царевич авардят?

— Мее аф авардян, воротатне ашесть панжев.

— А лефце коса? Лоткань морамда, лефозень сатозь панттне.

Симдезе, андозе.

— Матт, удок.

Василиса каясь посудас стама ведь, кула ведь и эрек. Озась лишмонц лангс, тусь лефть инкса. Мольсь панттнень ваксе, кармась морама вяшкомняса, лоткасть панттне шавомда, таргазе лефть. Ладязе, кода ульсь, валозе кула ведть мархта, сон вельмось. Вельмось и сась куду Ва-силиса Премудраень мархта. Фигар Царевичсь ергозсь удома вастста.

— Эх, щакай, лефсь ужяль!

Панжезе кенкшть — лефсь сувась.

— Вов тяса лефце!

Кенярдсь Фигар Царевич. Макссь Василисась простой ведь царевиченди.

— Архт, макск мамацти, тянь эзда правондай.

Тусь Фигар Царевич. Мольсь эсь кудозонза. Молодецсь няйсы:

— Вона, тонь цёраце сай тага. Сон мезьсовок аф шавови.

Сонць кяшсь аксялу. Сувась лефсь куду, тага кармась сеттнень сязендема. Мезьсовок аф кар-дави. Лиссь Фигар Царевичень мамац уторозонза:

— Мес, цёрай, аф кардасак? Эвфни эсонк.

Сувась Фигар Царевич:

— Леф, лоткак!

Лефсь лоткась. Фигар Царевичсь удось ве, шобдава стясь, тусь охотас ве лангс. Анокласть са-мозонза канатт — мушконь и шяярень. Титя молодецсь торай:

— Мярьк: «Цёрай, сотсайне кяттнень, мераса вийцень. Няк, тон козонга аф повондат».

— Эрь, мамкай, сотыть тяряфтьк виезень.

Мамац колмонь крда ашкодозень кядензон.

— Эрь-ка, цёрай. Тяряфтьк, сязевихть или аф?

Сон кодак тяфта пякстазень, сязезень долой.

— Однака, цёрай, ули вийце!

— Ули, мамай, Слава Богу!

— Эрь-ка, церай, сотсайне кяттнень шяярень пикснень мархта.

— Эрь, мамай, сотыть.

— Эрь, цёрай, тяни тяряфтк, сязевихть?

Сон кодак тяряфтсь — изь сязев.

— Эх, мамакай, керфтсайть кяднень.

Мамац нолдазе молодецть акеялда. Кармасть мечеа керсема Фигар Царевичень. Керсезь, да мяк сускомняс лефтьке керсезь. Лишмоть таргазень сельмонзон. Сускопнень вачказень кеп-терьс, щафтозе лишмонц еялдазе кептернянц и нолдазь вири. Вачкодсь лишмось коняса шуфтс. Василиса Премудрай содазе:

— Ну, — мярьгеь, — племянникозень керсезь.

Тусь вешендемонза. Музе лишмоть вирьста, вятезе эсь пяленза, кармась кочкама лефть суско-монзон. Кочказень-латцезень, кода эряви, валозе кула ведьса, валозе эрек ведьса — вельмось лефсь. Ну, давай кочкамс Фигар Царевичень сускомонзон. Латцезень, кода эряви, валозе кула ведьса, ранатне правондасть, валозе эрек ведьса — вельмось.

— Эх, щакай, кодама куватьс удонь!

— Удолеть, кда аф монь прязе. Тонь мамаце тонь тяфта тиензе. Тон, — мярьгеь, — шавить кемгафтува пряса куйть, кармать прятнень эса кевть алу вечкама, фкясь кеворсь моряти. И эз-донза тиевсь молодец. Мамацень мархта кармась эряма. Кунара тешендай лангсот.

— Тяни кода, щакай, мархтост тиендян?

— Вов кода тик: арак канарейкакс, да валк вальмя сельмонять лангс. Синь налхкихть картаса. Мярьгихть: «Титя кудонь канарейка, молян кундаса!». Кда валгат, кармай кундамот. Тон лийхть кузти, валк, коза аф сатыхть кяденза, тараткять лангс. Кармай кунцема кундамот — тон сяда вяри комотть. Куцть мянь коннять пряс. Кодак куци мельгат конняти, тон тоста валк, тиефть молодецке. Сон каясы панцырнянц — щафтк лангозост. И кармай валгома, керк кузть кафцьке бокста, вачкотьк кафцьке бокста весть-весть.

Сон тись, кода тонафтозе щакац. Мусь куз, ласьксь сон — Фигар Царевичсь — кузть пряс, кун-дазе ся молодецть и кармась сонь керсемонза. Керсезе мелкай кусоконяс и вачказе кептерняс. Маманц таргазень сельмонзон, щафтозень маманц еялдазе сускопнень:

— Архт, мамакай, тяни каннить тонць. Кода монь каннемань лишмозе, тонь кельк-фкяцень.

Фигар Царевич тусь щаканц пяли эряма, тячемс мархтонза эряй.

Записал финский этнограф Х. Паасонен в с. Вадовские Селищи
Спасского уезда Тамбовской губернии в 1920-х гг.
Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений"

Мокшанский фольклор Зубово-Полянского района

На первую страницу

Hosted by uCoz