Хитрай шабат

Эрясть-ащесть атят-бабат, синь ульсть стирнясна и цёранясна. Эрясть, эрясть, атять бабац, стирнять и цёранять тидясна, кулось. Атясь сявсь од ава. Од авась ульсь пяк кяжи. Сон мярьги атяти:

— Висайть вири цёраняцень мархта стирняцень, карман мархтот эряма, аф висайть — аф карман.

Атяти аш месендемс. Сявозень сон шабанзон вири кстыень туфталнка. Шабатне сявсть кяде-зост кептернят и тусть аляснон мархта вири. Якасть-якасть вирьге, алясна корхтай:

— Тинь арда койна боку, мон туян тона боку, может, стане сяда лама кстыда кочкатама. А, штоба тинь афоледе эрьгоде монь эздон, мон коста, коста карман шуфтонятнень калтыема, тинь стане и мусамасть монь.

Шабатне стане и тисть. Синь кочксихть и кочксихть кстынят. Шись арась иляденди, стирнясь корхтай брадонцты:

— Аде, браткяй, алязти, саты ни кочксеме, а то шоподи.

Синь мольсть алянцты ся калтыемать коряс, ваныхть, а шуфтть бокс повфтаф калтыема, ко-на вармать эзда калтыи, а аляснон пильгекинзовок ашет. Аварькшнесть-тисть, стирнясь корх-тай:

— Аде, браткяй, удома васта вештяма.

Мольсть, мольсть синь, ламос мольсть, ваныхть: вирь потмоса ащи аф оцю кудня, сувасть синь тоза, а тоса ащи Сернянь баба. Шабатне аньцек сувасть и мярьгсть:

— Чук, бабушка-матушка.

— Пара, — мярьги Сернянь бабась, — тяфта мярьгоде, а то сиволедязь. — Но тинь нинге тейне кондясттяда.

Шабатне кармасть Сернянь бабать пяле эряма. А Сернянь бабась андсыне пяштень товняда, ков куяфты эсост. Сонць бабась думандай:

— Курок справнайгодыхть, мон меле сивсайне.

Сон коль керселезень лемфтема сурняснон и ванондолезень, ашесть куялгода ли синь. Фкя ши-ня Сернянь бабась стяфтозень шабатнень и мярьги:

— Ну-ка, уштосте пянакудть сяда псиста.

Шабатне канненсть пенгат, и стирнясь уштозе пянакудть стане псиста, мяк кирпицневок якс-терьгодсть. Сернянь бабась кантфтсь оцю кайме и мярьгсь:

— Ну-ка, стирняй, марняс пурдафт каймоть лангс. Стирнясь кувалгоды, кувалгоды.

Бабась сюци эсонза.

— Бабай, вали тонць няфтьк, кода эряви, — мярьгсь стирнясь. Бабась максозе стирняти кир-демс каймоть и кармась каймоть лангс кирендема. Сернянь бабась кирендсь стане, што арась клокшкакс. Стирнясь, кодак сявсы, да ёрдазе пянакуду. Сернянь бабать сразу ваенза шянядсть. Тяфта стирнять мархта цёранясь лядсть живойста.

Рассказала в 1969 г. жительница с. Новые Выселки П.П.Рузмакова, 1909 г.р.

Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений".

Мокшанский фольклор Зубово-Полянского района

На первую страницу

Hosted by uCoz