Баняста муф рьвя

Эрясь-ащесь баняса стирь. Ульсь сон пяк мазы и наряжаф. Теенза баняс тонадсь якама цёра. Цёрать батяц ульцяв якай ялганц кизефнесы:

— Монь цёразе ков якай?

— Сон мархтонк аф якай, сон якай коза-бди лия вастова.

Батясь арьсезевсь, ушедсь цёранц мельге ванондома. Вов весть тялонда цёрась наряжась, лиссь кудста, варжакстсь кафта пяли и тусь салаваня велеть эзда коз-бди фталу. Батяц кяшендезь — мельганза. Цёрась мольсь видеста фкя банять ваксе, кона ульсь перетнень фтала, чакась-по-кась, сувась. Сувась баняти и озась тоса ащи стирть ваксе. Ушедсть фкя-фкянь мархта корхне-ма. Батясь ваны лангозост вальмя уженява и тянь сембонь няйсы. Соньге тоста, банястотне, няезь и вальмять тавадозь руцяняса. Батянцты аш мезе тиемс, панжезе кенкшть, сувась и ва-ны стирть и цёранц лангс. Семьянь тиемс од парась гож. Батяц терьтфтсь поп. Ся кадиланц мархта сувась, кармась морафтома. Попсь морафтсь, а стирсь веляфтсь пинекс, меле катокс и суви, увай, и мярькшни «мр, мр». Попсь пинеть-катоть кундазе, еялдазозонза каясь гайтян мархта крест, лувсь молитва, валозе святой ведьса и ся арась меки стирькс и пяк мазыкс. Цёрась корхтай батянцты:

— Батяй, а батяй, стирть кельгеа и сон кельгеамань, рьвяяфтомак.

— Ну, кда фкя-фкянь кельктяда, рьвяяк.

Тердезь свойснон, радняснон и тисть свадьба. Свадьбаса гулянкась мольсь сисем шит. Сисем шиве перьф сембе пиравандасть, симсть, ярхцаеть, кштисть, морасть, шутканят-баснят ёрясть. Свадьбась аделавсь — пец сонь ваясь ведьс. Кие тоса мусты — ся меки таргасы, винаса валсы, белай светти тага аф весть няфтьсы, модать лангса ломаттнень ёткс срафтсы. А кие тянди аф верондай, сонць ведти ваяй, свадьбать потмоса симома-ярхцама кармай, моркшть алу прай, мезевок аф муй.

Рассказала в 1967 г. П.И.Шуляева, 1912 г.р.
Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений"

Мокшанский фольклор Зубово-Полянского района

На первую страницу

Hosted by uCoz