Бабанянь цёра

Эрясть-ащесть бабаня и сонь цёраняц. Синь эрясть пяк беднайста: ашель мезьда ярхцамска. Бабать ульсь колма метрат котфоц. Сон максозе цёранцты фкя метрать миме:


— На мик, цёрай, тя котфть, да рамак кшиня, ватт, лия мезевок тят рамсе.

Цёрась еявозе котфть, мольсь базару, ваны, тоса мишендихть катоня. Цёрась полафтозе котфть катонять лангс и кандозе сонь куду. Аньцек тидяц няезе катонять и ушедсь цёрать сюцема:

— Да тон месть, или шорявоть, мезьда тяни анцак? Бабась керозе омбоце метрать котфть и максозе миме.

— Да, ватт, — корхтай, — штоба мезьге лия тят рамсе.

Цёрась мольсь базару, ваны, мишендихть пиненя. Сон полафтозе котфть пиненнять лангс. Сам-да меле тидянц эзда тага повсь цёрати. Тидяц колмоцеда кучезе цёрать базару. Мольсь, мольсь цёрась и ваны — тюрихть колдунць и ката. Цёрась еявсь и лездеь колдунтти. Колдунць мярьги:

— Аде, тяни монь мархтон. Сон озафтозе цёрать лангозонза и чопафтсь ведти. Вятезе цёрать кудозонза и макесь тейнза сурке. Кда сурксть яфодьсак, то мезе мярьгат, сянь и тии.

Сась цёрась куду и азондозе тидянцты:

— Ну, тяни, тидяй, минь вачеда аф карматама.

Сон яфодезе сурксть и шрать лангс появасть разнай пища. Синь кармасть эряма пяк лац. Цё-рась строясь цебярь куд, наряжась.

Весть сон тидянцты корхтай:

— Тидяй, мон рьвяян, архт оцязорть стиренц кизефтьк, шять, моли тейнё рьвакс.

Бабась мольсь оцязорть пяли, а тоса сонь аф нолдасазь, кодама, корхтайхть, нищай сась. Баба-нясь азондозе слугатненди, местема сась, а сят азондозь оцязорти. Оцязорсь корхтай:

— Нолдасьте ся глупай бабать.

Бабанясь сувась, тись поклон и азондозе, местема сась. Оцязорсь корхтай:

— Мес аф максса, толька вага мезе эряви тиемс: штоба вандыень шити вана тона ляйть турке цёрацё тиель золотань седь. Ся седьге ётай монь стирезе.

Сась бабанясь куду, азондозе цёранцты, мезе мярьгеь оцязорсь. Цёрась лихтезе сурксть, яфоде-зе и ляйть турке тиевсь седь.

Омбоце шобдаваня цёрась мольсь оцязорть пяли и кизефнесы:

— Ну, кодане, макссак стирцень?

Оцязорсь корхтай:

— Кизефтьсаськ сонцень стирезень.

Кизефтезь стирть, ся согласиндась. Цёрась яфодезе сурксонц и лиссть вете алашат. Синь озасть тоза и тусть церькаву. Церькавста синь тусть цёрать пяли. Мзярс эрясь цёрать мархта стирсь, пингонь ётазь стирть мольсь мялец эрямс цёрать мархта. Сон притворяндакшнесь, што цёрать кельгсы. Фкя илядня кизефнесы цёрать:

— Кода тон тяфта курок козякодоть?

Цёрась азондозе, кода сон козякодсь. Аньцек цёрась матодовсь, стирсь еявозе сурксть, яфодезе и сембось арась стане, кода ульсь, да цёрась нинге повсь лазф шочка ёткс. Сон аф шарови, аф ли-севи.

Тянь няезь катоть мархта пинесь. Синь тусть сурксть вешема. Пачкодсть оцязорть каршес. Ка-тось мявкстадсь, синь нолдазь. Ваны сон: стирсь уды пянакуд лангса. Катось куцеь пянакуд лангс, тонгозе стирть шалхке пулонц и кармась шукадема. А суркесь ульсь стирть кургса. Сон кодак кшняй, суркесь прась кияксти, пинесь фатязе и ардозь. Тейст эрявсь ётамс ляйть турке. Уемста синь суркть прафтозь ляйти. Якасть, якасть пинеть мархта катось ляйть крайге, аш ко-да таргамс сурксть. Ваныхть: тона бокса калонь кундайхть. Синь мольсть тоза, а ся пингть ка-лонь кундайхне лихтезь ведьста бредникснон. Ваныхть: фкя калть потмоса суркесь. Пинесь са-лазе калть, таргазь потмостонза сурксть, и максозь цёрати. Цёрась лиесь шочкть ёткста и тиезе семботь, кода ульсь. Рьвяясь простой стирь лангс и тячемс синь эряйхть.

Рассказал в 1970 г. житель д. Поповка П.С.Шуняев, 1910 г.р.

Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений".

Мокшанский фольклор Зубово-Полянского района

На первую страницу