Атякшсь, Шись, Ковсь

Менельса, вярдень нёбаса эрясть колма братт — колмонест: Атёкшсь, Шись и Ковсь. Мзярда Шись и Ковсь налхксесть, Атёкшсь шарондсь перьфкаст, Шить валондозе золотаса, Ковть архнезе сияса и, штоба синь афольхть явонда фкя-фкянь эзда, морсесь тейст моронят.

Матодови Шись — Атёкшсь моразеви-сргози, кончсесыне сельмонзон Ковсь — валдопты. Весь и Шись эрясть марняса. Цебярь шить лемнезь Маникс, а мазы шоподеметь — мани веке. Мирть эса фалу улендсь лямбе и валда. А коса валда, тоса и эряф. Налхксемста Шись комоти — тиеви цёракс, а мзярда Ковсь налхки — тиеви авакс.Кафта шамаса улендсь и Ковсь. Ласьки Ковсь Шить эзда, мяни, кяши туцять алу — няфтьсы пяле шаманц, тиеви месяцокс, цёракс, валдоц няеви цютькя, а мяни шить эзда — тиеви круглай шама аванякс. Сяс Шись и Ковсь арасть и акакс-сазоркс, альнякакс-брадокс или мирдекс-авакс. Разнай пингста синь тиендевсть разнайкс. Но весть Шись и Ковсь еялгадсть. Ковсь мярьги:

— Мон тоньфтемот мирть-масторть валдоптса.

Сялондомасна виензась сядонга эста, мзярда Шись кармась ялгакс аньцек Атёкшть мархта. Да кода тейст аф улемс ялгакс? Кафцьке синь ульсть мазыхть, якстерьхть, кафцьконь эзда ушеть-кшнесь шобдавась, кафцьке ушедсть фкя пингста мадондома, кафцьке стяйхть удома вастста валдть лисеманц мархта и ушедыхть налхкеема.

Шись нинге уды, атёкшсь ергози и морай, морай — Шить эса стяфты, толонц крьвястьфтсы. А инголи тя тевть тиендезе Ковсь, тяни аньцек Атёкшсь. Тя сембода кяжияфнезе Ковть. Кар-мась сельмодезь ванома мельгаст. Сельмодсь, сельмодсь, седиенц изь кирде и весть, мзярда Шись конезень сельмонзон, Ковсь панжезе сонцень кельме сельмонц, фатязе атёкшть, керфто-зень пацянзон и ёрдазе мастору. Эстонь пингста еявомок, атёкшсь эряй аньцек модаса, но ёрай лийкстамс вяри, куцемс Ши ялганцты, но аф куцеви.

Эста Шись лоткась ковть мархта и корхнема, и налхкеема. Шись ушедсь Ковти гразяма, мель-ганза паньцема.

— Кда сатте, Ков, — корхтай Шись, — эсь толозень мархта пидете, кафтува явфтте.

Тяфта и тусь: Шись лиси — Ковсь кяши, Ковсь лиси — шись юмай. Кой-мзярда синь фкя — фкянь мархта васьфневихть. Тя уленди кизоти кафкеть — кодак Шись и Весь арсихть фкакс. Но тя уленди аф куватьс. Васьфтемда меле Шись и Ковсь нинге сяда пяк еялондыхть и явихть, ушедыхть фкя — фкянь мельге панцема. Аньцек лиси Ковсь, аф лама пингта меле ли-си и Шись, и ушеды одукс паньцема. Сргози Шись — Ковсь юмай. Мады Шись — лиси Ковсь. Эстонь пингть Шись еявозе шинь валдть, а Ковсь еявозе вень валдть. Шинь валдсь тиевсь зо-лотойкс, веннесь — сияннекс. Но ингольдень эряфенон лятфнемста, ламотне ниге корхнихть: Шись цебярь, лямбе-мани весь. Стане и тиенди Атёкшсь. Ковть лисемста кяши, а мзярда Ковсь кяшсы прянц и Атёкшсь марямок, што Шись сяськозе Ковть, кельмоть, гайфнесы:

— Ку-ка-ре-ку! — морай, а мзярда Ковсь сяськи, Атёкшсь аф ламняс ащи апак морак. Кодак шись кармай ергозема, Атёкшське сргози и моротнень мархта мазоми модась и менельсь. И тя ушедовсь пяк кунардонь эряфйа.

Рассказал в 1969 г. житель c. Новые Выселки Е.П.Казеев,1894 г.р.
Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений"

Мокшанский фольклор Зубово-Полянского района

На первую страницу

Hosted by uCoz