Алёнушка

Эрясть-ащесть атят-бабат. Синь ульсь стирнясна Алёнушка. Весть Алёнушкась тусь ялган-зон мархта вири пангонь кочкама. Якасть-якасть вирьге и Алёнушкась эрьгодсь ялганзон эзда. Кармась синь вешендемост. Якась-якась и мусь кудня, кенкшенза панжадот, потмосонза кивок ашель. Сувась Алёнушка кудняти и кармась ванома, кие эряй тя кудняса. Сувась ся кудняти Баба-Ягась и няезе Алёнушкать. Андозе-симдезе стирнять и мярьгсь сонь матомс. Алёнушка кармась уряфтомонза Баба-Ягать. Матодовсь Баба-Ягась, а стирнясь лиесь крылецть лангс и кармась авардема. Ётай келазсь и кизефтезе:

— Мес, Алёнушка, авардят?

— Кода мон аф авардян, Баба-Ягась аф нолдасамань куду, — отвечась Алёнушкась.

Келазсь мярьгсь стирняти озамс лангозонза и ювади:

— Алёнушка, уряфтомак.

А стирнясь ульсь ни ичкозе. Сявозе Баба-Ягась шувар петьколенц и давай ювадема:

— Шувар-петьколь, гай-гай, Алёнушкась меки сай.

Пяле киста сатозе стирнять и келазть. Келазть керозе кучкава, а стирнять сявозе меки эсь ши-резонза.

Тага мярьгсь Баба-Ягась матфтомонза. Стирнясь тага лиссь крыленцять лангс и кармась авар-дема. Ётай ваци пула буканя и кизефтезе стирнять:

— Алёнушка, Алёнушка, мес тон авардят?

— Кода аф авардян, Баба-Ягась монь аф нолдасамань куду.

— Озак монь лангозон, минь ворьготтяма.

Озась стирнясь буканять лангс и ворьгодсь Баба — Ягать ширеста. Алёнушка сявозе мархтонза Баба-Ягать кштиренц.

Баба-Ягась сргозсь и ювади:

— Алёнушка, уряфтомак!

А Алёнушкась изь отвеча. Шарьхкодсь, што стирнясь ворьгодсь, сявозе шувар петьколенц и кармась ювадема:

— Шувар петьколь, гай-гай, курок Алёнушка сай.

Вов сатнесыне Баба-Ягась синь, эста стирнясь ёрдазе кштиренц и лиссь оцю панда. Баба-Ягась порсь, порсь пандть эса, цють-цють поревсь и тага тусь мельгаст. Вов Баба-Ягась сатнесыне, эста букась назминдазе Баба-Ягать. Ушедсь шаманц штама. Штась, штась шаманц эса и тага тусь Алёнушкать мельге. Но синь ульсть ни кудса. Пачкодсь Баба-Ягась стирнять кудснон тейс и марясы, кода стирнясь маманц и батянц мархта кштикшнихть-кенярькшнихть, да буканяти спасиба азондыхть.

Баба Ягати аш мезе ульсь тиемс и тусь меки вири.

Шуморсь пец, ваясь ведьс.

Рассказала в 1967 г. жительница с.Мордовская Поляна Д.А.Иванова, 1900 г.р.
Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений".

Мокшанский фольклор Зубово-Полянского района

На первую страницу

Hosted by uCoz