Алашань азор

Весть мокшень цёрась еявозе алашанц и тусь масторть шарома, модать ванома. Пачкодсь фкя эрьхконяс и алашац корхтай:

— Азор, азор, тяса печкомак, а кедезень тяк ёрда, еявк мархтот. Мзярда, мзярда, сон тейть эрявкстоми. Кодак сай пинге, сон эрявксты, срафтк — кепотьк. Срафтсак — кепотьсак сонь, виде пилькцень шятяк лангозонза и мезе тейть эряви, азк.

Азорсь печкозе алашать, сиволенц ёрдазе. А кеденц пуроптозе, сотнезе и еявозе мархтонза Мольсь, мольсь, но пачкодсь королень саде, лоткась ваймама, кеденц путозе тоду вастс и мато-довевь.

Ся пингть корольть садоц кармась коськома. Коськи и коськи. Мес? — Кивок аф шарьх-кодьсы. Корольсь тяштсь кагод, коса корхтавсь:

— Вешендеви стама-стама ломань, кона машты коське шуфтонь живолгафтома.

Корольть советникоц — атясь корхтай:

— Костонга тят вешенде стама ломань, косовок сон аш. Сембе светть ётак — аф мусак. Косовок аш, а вов минь содасаськ, тяфтама ломань ули. Мон лац содаса, што сон уды садонь фкя шуфтонь ала.

Корольсь тердезень слуганзон, мярьгсь тя ломантть тердемс. Мольсть слугатне ся алашань азорть ваксе, стяфтозь, азозь молемс, атказась. Корольсь инксонза кучезе эсь советниконц. Сяндивок ашезь тердев. Эста тердемонза мольсь сонць корольсь. Корхтазевсть. Састь фкя мяльс-валс. Сувасть дворецу и корольсь тяштсь тяфтама договор:

— Комсь сисемце шити садть живолгофтомс, штоба сон нолдаль юрхт. Лопияль и кармаль пан-жема. Кда марлюфне аф живолгодыхть, аф ноладйхть ундонят, аф кармайхть панчфса панже-ма, алять пряц ули керф и кепотьф пирьфса ащи налть лангс. Тоса корольсь мярьгсь:

— Сембе тя пингть симдемс и андомс алашань азорть стане, кода тейнза эряви.

Мярьгсть ваймамс дворецть потмоса. Сон жа ашезь моле дворецти, тусь садть потмос, музе сяка жа марлють и мадсь алонза. Тяфта сон каваняфоль и ваймосесь сембе комсь сисем шитнень и ветнень перьф. Мзярда варьхмодсь комсь кафксувоце шиня, сон стясь, келептезе алашань кедть тишетнень лангс, ацафть лангс шятязе виде пильгонц и мярьгсь:

— Тя садсь эряви живолгофтомс, штоба сембе коське марлюфне нолдальхть юрхт-ундонят, штоба синь вельхтявольхть лопаса, лопатне пяшкодельхть панжи кутюняса.

Меле ашкодозе тя алашань кедть, путозе сонь прялонза тодуня вастс и тага мадсь кеме удома-са. Мзярда обед малас ергозсь: садсь пяшкотьфоль сенем, акша, якстере панарса и ётковаст тов-сей лиендсть бзолды мешне.

Тянь колга кулясь эзкак пачфтевсь корольти и тяса жа, садть потмоса, сон тись оцю пир.

Корольть ульсть колма стиренза. Арси: пингена лисемс рьвакс. Мярьгсь тиемс свадьба. Но свадьбась ашезь тиев, стирец рьвакс ашезь тув. Корольть вестовоенза кандсть сёрма. Сёрмась ульсь комсь котува пря инекуйть эзда. Сон тяштсь:

— Тейне, куйти, ускома ляй берякти оцю стирце. Аф усксак варьхмодема пингти — эсь пря-цень сюдок. Молян эряма вастозт, двореццень плхтаса, нароттцень и тонцень шафтядязь, мо-дать менельть мархта шовордаса.

Стямок моркшть ваксста, коса сон пиравась, корольсь мярьгсь:

— Кие араласы стирезень, сянди максса рьвакс. Стирезень мархта максан и царства. Кивок ме-зевок ашезь аза. Эста садонь живолгафтысь, пшкядсь:

— Мон араласа стирцень!

Сон куроконя тусь ляй берякти инекуйть учема, а кучерти мярьгсь:

— Уск тяза и стирть.

Кучерсь ускозе стирть алашань азорти и стирьти мярьгсь:

— Мон мадан плманжатнень лангс, и кда пяк матодован, и аф стяфтован, вов тейть ерго-земня. Кда сай куйсь, тя ерхцемнязень токафтк прязонь, кармак вешема прязень и ергозян.

Путозе прянц алашань азорсь стирть пильгонзон лангс и матодовсь танцти удомаса. Аф лама пинкта меле кеподсь варма, кармась синнема шуфттнень, кармась ёряма тараттнень, лопат-тнень и стирь эчке шуфтонь ундос кяшсь. Эвондась корольть стирец. Но мезе тият — аф мяне-ви стирсь, ушедсь цёрать прянц сеендема, вешендема ерхцемняса токсема: цёрась кодавок аф стяфтови. Сон и вадердасы прянц и ангоряй цёрать прянц эса, уды цёрась, бта кула, аф стяфто-ви. Стирсь ушедсь авардема, аварди и аварди. Но вов сонь салу сельмоведец прась цёрать ша-мас и ся комотсь:

— Во удонь! Удонь пяк танцтиста.

А стирсь корхтай:

— Удолеть нинге сядонга кувать, кда аф монь сельмоведезе.

— А мес ашемайть стяфта ерхцемнязень мархта?

— Стяфнень, стяфнень, сеендень и вешендень, сембе сяка удат.

— Ну, ладна,шарфтт, копа пяльде, — мярьгсь цёрась.

Келептезе алашань кеденц, путозе лангозонза виде пильгонц и приказандась:

— Лезтт тейне!

Аньцек тяфта кенерсь валонц азомс, лиесь пандошка айгор и корхтай:

— Мезе эряви тиемс?

— Тейть эряви шавомс куйть.

— Кундак кемоста оцю шуфтти и киртть. Мон уфан лангозт, тон арат оцю богатырькс. Азорсь кемоста ашкордазе эчке и сире тумоть, айгорсь уфась лангозонза, цёрась арась таза тумокс. Вов куйсь сась:

— Мон тердень фкя ломань обедамс, а састь кафта, да нинге айгор. Кафттнень тяни сивсайне, айгорть кадса ужинонди.

А богатырькс арай цёрась корхтай:

— Васенда варжасаськ кие кинь сиви. Пряцень шнама маштат и пряцень аралама маштт! И синь кармасть тюрема. Тюрихть частшка, тюрсть ни кафтошка — сясыш аш. Сембе модась тококс тиевсь, шуфттне синневсть, панттне ровнайгодсть, перьфпяльсь пуль ёткс кяшевсь. Сяськи аш. Но вов богатырь цёрась ваймонц таргазе крхкаста весть, сядонга крхкаста — омбо-цеда, сядонга комась модати, тоса вдруг комотсь вяри и кодак яфоди сабляса — лятцсть куйть вете прянза, нинге весть яфодезе кяденц — нинге вете прянза куйть кеворсть. Нинге яфодсь — нинге прянза кеворсть. Нинге яфодсь — нинге прятне яфодевсть модать лангс. Сембе куень прятне ульсть валхтфтт. Синь богатырень алашась кевордезень оцю лотке, вельхтязень оцю кевса.

Кучерсь валгеь шуфттнень потмоста, кяшсь кусторкснень алу. Стирсь варжакстсь и мезе няи: богатырь цёрась кармась керома куйть остатка прянц, а куйсь корхтай:

— Мокшень цёра, богатырь, тят кера остака прязень, мон тейть эрявовкстан. Мезе ули монь пизосон — тонь ули.

А цёрась корхтай:

— Мезе эряви тейне, монць сафтсан. Тячи тейне мезевок аф эряви, аньцек тонь пряце керови, тя тейне и эряви.

Алашань азорсь, мокшень богатырсь, керозе куйть прянц, ёрдазе лоткти и матразе оцю кевса. Стирсь цёрати пшкядсь:

— Аде мархтон батязти. Тейть путови честь.

А цёра — богатырсь корхтай:

— Аф молян, аф ламос вайман, удан. Кда эряван — мусамасть тяса.

Королень стирсь валхтозе види кядьстонза сурксонц и максозе цёрати. Сурксть мархта ве-нептсь и руцяня, а сонць ерхкась дворецонза. Кучерсь лись кусторкснень алда, салаваня тусь ласькома, лиесь стирть каршес и корхтай:

— Кда мярьгат аляцти, што мон тонь аралайхтень — лядат шиса. Азсак, што аф мон сясь-кине куйть — белай светса тейть аф эряма.

Кучерсь и стирсь тяфта пачкодсть куду.Корольсь кизефтезе, кие шавозе куйть. Кучерсь мярь-геь:

— Куйть шавине мон, и шавине тёждяста — фкя кядень цяподезь.

Корольсь корхтай:

— Куйть шавить тон, стирезень ваймонц идить тон, тондейть ули и рьвакс.

Тисть оцю пир, оцю свадьба, но свадьбать кучкаста корольти кандсть нинге фкя каготкя тяф-тама тяштькс мархта: «Мон кеветие пря мархта инекуйсь, ёран еявоме тонь кучкастонь стир-цень. Сон тусь мялезон. Аф макссак — сюдок эсь пряцень».

Корольсь корхтай:

— Ну, кучер, тон няфтить оцю вийцень, оржа ёньцень, ёжу шицень, няфтить синь нинге весть. Аралайть оцю стирезень, аралак и ёмлать.

Валонь апак аст, кучерсь кильдезе алашанц, озафтозе корольть омбоце стиренц, пачкодсь ляй берякти. Алашанц прдазе сендихнень ёткс, а стирть кучезе шуфта ситерькснень ёткс, сонць жа кяшсь оцю шуфта пряс.

Вдруг менельсь равчкодсь, кеподсь варма и пульса ашкордавсь сембе перьфпяльсь. Стирсь ласькесь уды мокшень цёрать вельхкес, кеподезе прянц коленканзон лангс и кармась авардема. Аварди и аварди. Тя авардемань вайгяльти и прай сельмоветтненди мокшень цёрась сргозсь:

— Ну и удонь!

А стирсь корхтай:

— Удолеть тон нинге куватьс, кда аф мон. Срхкак, вов тага эвотькесь врьгятсь.

Стирсь семботь, мезе ульсь кудсост, азондозе, а цёрась мезевок ашезь пшкядя, аньцек мярьгсь:

— Ну, и мезе кда? Эрь тевть сонцень тииец! Кда тевсь аф тиеви — аш месть сон и ушет-кшнемс.Удомазе ашезь янга, прязе мес-бди шары, аф ламоняс мадан. Кда мезе лиси — ерхцем-нязень токафтк прязон, вешк прязень — мон и сргозян.

Мокшень цёрась аньцек кенерсь матодовомс, стирсь марясы: эвотькссь вов — вов сай. Кеподсь вишке давол, зерькстась лашмось. Шерьхкозевсь модась. Стирсь шарьхкодсьхай куйсь — вай-монь сявиец. Кармась авардема. А стяфтомс цёрась ужяль. Сельмоведец прась удыть шама-зонза, сон стясь самай пингстонза. Куйсь маладсь тейст: «Мон тердень фкя, а сась колма. Кон-дястихть топодемс».

Ушедовсь тюремась. Куйсь цёрать лангс уфай, ляценди толхт, сембе перьфпяльсь крьвязсь. А цёрась эци малазонза, яфодьсы саблянц — прятне ляцихть, но эзкак пезфтавихть сялдазонза. Вов цёрась синь курокста цяподезень и комотсь лангозост, токазень и ёрдазень лоткти. Тяфта ульсть истожафт куень сембе прятне и лангета вельхтявсть стака кевса. Мокшень цёрась шаштсь стирть ваксе и корхтай:

— Тяни тон свободнаят, коза ёрат — тоза и архтт.

Стирсь отвечась:

— Аде марса мольхтяма алязти. Тейть тоса аноклави оцю казне.

— Мон аф молян аляцти, — мярьгеь цёрась, — кодамовок тевозе аш тоса. А кда эряван — мон тяса карман улема.

Стирсь таргазе види кядьстонза сурксонц и руцянянц мархта венептезень цёрати. Цёрась меки мадсь вастозонза.

Кучерсь шуфта пряста няезе тянь семботь, валгеь алу, салаваня инголдазе стирть моле-манц и пшкядсь:

— Аляцти азсак сянь, мезе мон азан. Куйть шавине мон, тонь эряфцень ванфтыне мон. Азсаськ тяфта — модать лангса кармат эряма. Тяфта аф азсак — улят кулыхнень ёткса.

Куду пачкодемда меле, корольсь кизефтезе кучерть:

— Кие, кода шавозе куйть, кие аралазе стиренц?

Кучерсь корхтай:

— Да кие шта, кда аф мон?

Корольсь тись пир, кучерть озафтозе шрать ваксе кудть ингольдень вастозонза, каванязе, кода эряви и мярьгеь:

— Ванды тихтяма свадьба, кучкаста стирезень максса тейть рьвакс.

Ломаттне симсть-ярхцаеть, ёрасть тумс ни куду, штоба ванды ранакиге самс свадьбас. Но тя жа пингть кандсть сёрма. Корольсь луви: «Тон, король, кда аф макссак стирцень сивомс, тонць юмат-арат, юмай-арай и нароттце, и масторце. Кемонь пряса куйсь».

Корольсь тердезе кучеронц и корхтай:

— Кафта стирнянень маштыть араламс, аралак и колмоцеть, инь ёмланять.

Кучерсь кильдезе алашанц, озась лангозонза, озафтозе ёмла стирть и тусь ляй трвати. Мзярда ведень берякти лядсь аф лама, кучерсь валхтозе стирть, кадозе, а сонць куцеь шуфта пряс. Стирсь аварьгодсь.Удомбачк богатырсь марясы: кие-бди аварди. Сон курокста ергозсь, тусь авардить шири. Мольсь стирть ваксе и кизефни:

— Мее, мазыняй-матаняй, Тяфта пяк авардят? Или кие обжанзе? Или вачаши сатонзе, или мезе лия кальдяв лиесь?

Стирсь азондозе эсь горянц-нужашинц. Богатырсь корхтай:

— Кафта шит, кафта вет кодавок аф ваймаван, а сизень мон пяк. Давай аф ламняс путса пря-зень плманжатнень лангс, цютькя удан. Кда мезень-бди зиян тиеви — еявк ерхцемнязень и пяльхкяняцень мархта вешк прязень, сеентьк и пяконя ангордак — ергозян.

Азозе цёрась валонц и матодовсь. Кеподсь вии давол, перьфпяльсь пяшкодсь равжа толса, шуфттне ушедсть вельсема и стирсь шарьхкодсь: ваймонь сявиец вов — вов малады. Аварь-годсь. Аварди и аварди. Пси сельмоведенза шудерьксокс шудихть. Фкясь эздост, сембода оцюсь, прась цёрать шамас и ся ергозсь, комотсь вастстонза:

— Ну, и танцтиста удонь! Кие сязезе онозень?

Стирсь корхтай:

— Удолеть сяда куватьс, но бедазе вов-вов маласа.

Богатырсь шарьхкодсь: ергозсь пингстонза. Сон ушедсь тюрема куйть мархта. Керозень сембе лакай прянзон, алашать вельде ёрязень синь крхка лотке, вельхтязень стака кевса, пакш-кят-нень керсезень, куйть бзмолды ронгонц, яфчек-яфчек яфии пулонц и стирти мярьгсь:

— Тяни тонь волясот. Эряк кода эрять. Тийхть кода эстейть тиеви.

Стирсь мярьгсь:

— Аде ширезонк. Эсот сембе учихть. Тонь тоса учтанза оцюдонга оцю казне.

Цёрась атказась молемс стирть мархта корольть дворецозонза. Эста стирсь валхтозе сурк-сонц, таргазе руцянянц и максозе тейнза. А цёрась, получамок тянь, мольсь сяка вастозонза, мадсь удоманц кувалгофтома. Кучерсь валгсь шуфтть пряста и корхтай стирти:

— Кда тон аф азсак аляцти, што мон шавине куйть — печкте. Тейть веляфтомс аш коза: сембе сяка кулома.

Тяфта корхнезь синь пачкодсть дворецти. Корольсь кучерть кизефтезе:

— Кие и кода шавозе куйть? Кучерсь мярьги:

— Кие мондедон башка. Аф эряви якамс содай бабанди — куйть шавине мон. Аньцек мон! Ко-рольсь кундазе кучерть види кяденц, вятезе шрать ваксе, озафтозе сонь цебярь ваетти и пиро-вандама ёткть сон кизефнесы, кона стиренц еявсы рьвакс. Сон идезень стирензон, сон и кочкай эстейнза рьвя. А стирхне аляснонды корхтайхть :

— Аф, аф сон идиеньке-аралаеньке. Аф сон ваймоньконь ванфтозе, а лия ломань.

— Да кода стане? — мярьгсь корольсь.

— Да стане, стане, — отвечасть стиренза. — Катк сонць азондсы, кода сон минь араламазь. А кучерти мезе, сембе тюрематнень няезень и азондозе видеста сембе тефнень. А стирьхне нинге:

— Минь араленьконди мезе-бди максоме. Мезе? Кда тон минь идемасть — няфтьк ся «мезть».

Корольсь стане жа педсь:

— Тон, кучер, сельмозон ватт — «мезсь» тя мезе? Кучерсь отвечась:

— «Мезеть» и «мезетнень» ёряйне эрьхконяти.

— Няфтить, коса куень прятне? — кизефнесы корольсь.

И сон сембе инжиензон мархта кучерть вятезе ляй берякти, коса тяда инголи ётасть колма тю-рематне. Кучерсь няфтезе лоткть и азозе, што сон тяза ёрязень куень прятнень, тяса жа вель-хтязень кевса.

— Ну, кепотьк, кевть, няфтить куень прятнень!

Кеподи, кеподи кучерсь кевть эса, аф кеподеви. Нльне кевсь аф шерьхкозеви. Ломанень жалф-ти ергозсь богатырсь, маладсь ся ляйти, сяськозе кевть, кеподезе и ёрдазе, тоса стирьхнень азфенон коряс, няфтезень синь сурксснон и руцяняснон.

Сембе шарьхкодсть, кие аралазень стирьхнень ваймоснон. Эста кучерть сотозь алашань пулос и нолдазь ардома шава пакеява. Кучерсь шавовсь. А богатырть корольсь еявозе дворецозонза, мярьгсь кочкамс колма стирензон эзда инь кельговиксть. Богатырсь азозе, што инь кельгови-кесь, ёмла стирсь, а стирть мархта корольсь макесь тейнза пяле царства.

Мон улень пялост: эряйхть лац. Васьфтемазь, андомазь, симдемазь, каванямазь, макссть марх-тонга. Тердемазь ширезост нинге. Пади, и молян. Кда кальдявгоды эряфсь.

Рассказал в 1967 г. житель д. Поповка П.С.Шуняев,1910 г.р.
Приведено в книге : Б.Ф.Кевбрин, В.И.Рогачёв, А.Д.Шуляев "Живая память поколений"

Мокшанский фольклор Зубово-Полянского района

На первую страницу

Hosted by uCoz