|
|
Сергей Кинякин
ЯКАНЬ-ЯКАНЬ, ЯЛГАНЯКАЙ...
Монга яксень, ялганякай,
Пиж лугава,
Пиж лугава, ялганякай,
Каль юрнява.
Монга кельгонь, ялганякай,
Мазы цёра,
Мазы цёра, ялганякай,
Седи мора.
Сявондемань, ялганякай,
Ош базару.
Ош базару, ялганякай,
Мянь Инсару.
Каванямань, ялганякай,
Лампасейда.
Лампасейда, ялганякай,
Ламбам эйда.
Тяни итень, ялганякай,
Идь нюрямня.
Идь нюрямня, ялганякай,
Прянь прдамня.
А сон якай, ялганякай,
Пиж лугава,
Пиж лугава, ялганякай,
Каль юрнява.
ФИЛЬКАНЬ ЯГОРАСЬ
Мее пяк аварди
Филькань Ягорась?
Мее пяк кольгонди
Велезем церась?
Ягор аварди
Шава паксяса,
Шава паксяса
Прянянц тапсесы.
Аш сонь кулиец,
Аш сонь маряец,
Аш сонь кардаец —
Сельведь нардаец.
Весть сонь кулезе,
Весть сонь марязе
Сисем велень стирсь —
Оськань Марянясь.
— Мее тон тяшкава,
Ягор, авардят,
Стирень седиса
Цяткнень сявардят ?
— Вай, тон, Маряняй,
Васень маряйняй!
Азса правдазень,
Азса видезень —
Ланган ардызень,
Сединь пидизень:
Митянь Васянясь
Пезень сатозе,
Одонь эрьгязень
Толонц матозе.
Башка модаса
Седис вадемань:
Фермеркс лемдемань,
Азоркс ладямань.
Тракторхт надияфтсь, —
«Конат дубош стяйхть», —
Да июамат-месть —
«Демократонь пейхть».
Кафта кизот лийсть,
Моли колмоцесь.
Сон кшнинь кайме кучсь
Тейне колмочесь.
Именной, кле,
Кле, вельденза
Сонцьке дачаса
Ванфни эрьганзон.
Тейнза пачфнине,
Кода пици вер,
А сон тракторть вастс
Венептсь ваучер...
Визькс пяк, Маряняй,
Велеть инголе:
Пря аф андови,
Пря аф симдеви.
Нужань няисян
Ськамон аймакса,
Шувомс калма лядсь
Ся кшнинь каймоса.
Сяколь паршизе,
Ваймонь идизе,
Катикие вдь
Сяньге «пидезе».
— Лоткак, Ягора,
Демократ-цера!
Якань, васьфнине
Митянь Васяцень —
Седис ласьфтицень,
Ваймонь басяйцень.
Кода келькте тонь,
Тейнза азыне
И тя каймоса
Коняс лазыне!
Аде, Ягора,
Марстонь фермазонк,
Кона педсь-сувась
Одонь вернязонк.
Тоса эрявихть
Алянь кеме кятть,
А илять-илять
И... аф аньцек кятть...
И тусь Ягорась,
Демократ-церась,
Траксонь потьнема,
Потянь котьфнема.
ОД ЭРЯФОНЬ ПЯЛЬКСНЕМАТ
— Алё, алё! Тя фирмась — «Толмархт»?
Мондейне аваня фкя вес...
Мзяра ?
Сяда ?
Аньцек доллархт ?
Да ваучерга сяконьбес ?
А кушманьгорянть — тяни мезе ? —
Сонь тяни питнецка ни аш ?..
Но авань ляпе вайгяльть эземс
Мольсь кержи пилесонза кашт.
Ватт, коза пачкодсть сии прятне !
Аф мезе-мезе — доллархт пантт !
Да дяряй улендсь — афольхть сатне
Букати траксне ?!
Меколанкт !
Цё ! Голубков аф каля-маля,
Сон васта ваучерти муй !
Работафтома — фкявок аля !!
Расейтьке тевоц, ванат, туй...
— Алё ! Тя фирмась — «Кушманьгорятть» ?
Мондейне аляня фкя вес...
Мзяра ?
Поколь?
«Шуфтонь борят» ?
И фкя «Распутин» сяконьбес ?
Аф, аф... аф питни... мезень питне..
А сяда питни... алят аш ?..
Котьф ! ронгоц котькоди и китни,
Но сетьме... трубкась моли кашт.
...Россиясь осалдонга осал
И вийда-еньда машни, шять.
Работайхть фирматне...
А тоса
Аф етть, няк, эрявихть, аф кятть.
АФ АПРЯКАН ЭСОТ
Аф апрякан эсот и аф сингоряте
Тюжя панчфонь каннемда свал.
Нать, монць муворан: путомаль стирень пряти —
Синь явомань кандыхть туфтал.
Аф апрякан эсот, сонь мархтонза кице
Удалаза кафтонь-крда.
Стак ащемда, кельгомняй, седизень пицеть
Мель-мельцек мзяра тунда.
Аф апрякан эсот и прявок аф шаван,
Рузаваце катк кунеляй.
Но седись аф кевонь — аф лазсак кучкава,
Сон колгат ризнай и ризнай.
Аф апрякан эсот, аф апрякан эсот,
Мес кядьбезон ашеть кунда.
А пацяне улельхть, тон мулеть пря песот
Юрнай мака панчфонь тунда. |
